بھارت نے بنگلہ دیش میں اپنے تمام ویزا سینٹرز کو غیرمعینہ مدت تک بند رکھنے کا اعلان کیا ہے۔
بھارتی میڈیا کے مطابق، بنگلہ دیش میں بھارتی ویزا سینٹرز کو بند کرنے کا فیصلہ وزیراعظم حسینہ واجد سے جبری استعفیٰ لینے اور ان کے بھارت فرار ہونے کے بعد وہاں پیدا ہونے والی’غیرمستحکم صورتحال‘ کے پیش نظر کیا گیا ہے۔
یہ بھی پڑھیں: بنگلہ دیش میں حکومت کا خاتمہ، بھارتی میڈیا کی پاکستان پر چڑھائی
’انڈین ویزا ایپلی کیشن سینٹر‘ نے اس حوالے سے اپنی ویب سائٹ پر ایک نوٹس شائع کیا ہے جس میں درخواست گزاروں کو آگاہ کیا گیا ہے کہ انہیں اگلی تاریخ کے بارے میں بذریعہ ایس ایم ایس مطلع کردیا جائے گا جس کے اگلے روز وہ اپنے پاسپورٹ حاصل کرسکتے ہیں۔
بھارتی ویزا سینٹرز کی جانب سے یہ اعلان حسینہ واجد کی حکومت کے خاتمے اور ڈھاکہ میں انڈین ہائی کمیشن کے 190 سے زائد غیرضروری اسٹاف ممبرز کے انخلا کے بعد سامنے آیا ہے۔
یہ بھی پڑھیں: مودی خوفزدہ، بھارت نے بنگلہ دیش سے ملحقہ سرحد پر کرفیو نافذ کردیا
یاد رہے کہ بنگلادیش میں 1971 کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کے خلاف طلبہ نے جون میں احتجاج کا اعلان کیا تھا۔
میڈیا رپورٹس کے مطابق، بنگلہ دیش میں کوٹہ سسٹم کے خلاف احتجاجی مظاہروں میں 300 سے زائد افراد ہلاک ہوگئے تھے۔ 5 اگست کو بنگلہ دیشی آرمی چیف جنرل وقار الزمان کے حکم پر وزیراعظم شیخ حسینہ واجد اپنے عہدے سے مستعفی ہوکر بھارت روانہ ہوگئی تھیں۔
