آئی پی ایل میں پاکستانی کرکٹرز شامل نہیں تو ہمیں پریشان نہیں ہونا چاہیے، عمران خان

سابق وزیر اعظم عمران خان نے کہا ہے کہ اگر بھارتی کرکٹ بورڈ انڈین پریمیئر لیگ میں پاکستانی کھلاڑیوں کو شامل نہیں کر رہا تو پاکستانیوں کو پریشان نہیں ہونا چاہیے کیوں کہ ہمارے پاس پی ایس ایل کی صورت میں بہتر پلیٹ فارم موجود ہے۔

غیر ملکی ریڈیو کو انٹرویو دیتے ہوئے سابق وزیر اعظم عمران خان نے کہا کہ میرے لیے حیران کن ہے کہ بھارتی کرکٹ بورڈ نے پاکستانی کھلاڑیوں کو باہر رکھا ہوا ہے۔ یہ بھارت کا تکبر ہے۔

عمران خان نے کہا کہ دنیائے کرکٹ میں بھارت آمدن کے حوالے سے آئی سی سی کے کسی بھی رکن ملک سے کہیں زیادہ صلاحیت رکھتا ہے۔ بھارت کے رویے میں تکبر پایا جاتا ہے اور وہ ایک سپر پاور کی حیثیت سے کرکٹ کو چلا رہا ہے۔

انہوں نے کہا کہ بھارت فیصلہ کرتا ہے کہ کس کو کرکٹ کھیلنی ہے کس کو نہیں ہے اور اسی بنا پر بدقسمی سے پاکستانی کرکٹر آئی پی ایل میں نہیں ہیں۔

عمران خان کے مطابق پاکستان سُپر لیگ میں کھیلنے کے لیے غیرملکی کھلاڑی آتے ہیں۔ پاکستان میں بہت اچھے نوجوان کرکٹرز سامنے آرہے ہیں۔ ہمیں انڈین کرکٹ لیگ کی فکر نہیں کرنی چاہیے۔