پیرس اولمپکس میں گولڈ میڈلز جیتنے والے پاکستانی ایتھلیٹ ارشد ندیم کو والدہ کی جانب سے بیٹا کہنے پر بھارتی جیولین تھرور نیرج چوپڑا نے کہا ہے کہ ان کی والدہ نے یہ بات دل سے کہی ہے کہ ارشد ندیم ان کے بیٹے جیسا ہے۔
نیرج چوپڑا نے کہا ’ میری والدہ سوشل میڈیا سے متاثر نہیں ہیں اور وہ ہمیشہ اپنے دل کی بات کرتی ہیں، میری ماں گاؤں میں رہتی ہیں اور وہ پاکستان اور بھارت کے تعلقات کے حوالے سے سوشل میڈیا اور ٹیلی ویژن پر آنے والی خبروں سے متاثر نہیں ہوتیں۔‘
یہ بھی پڑھیں: والدہ نیرج چوپڑا کے ارشد ندیم کو سراہنے پر نریندر مودی کا کیا ردعمل تھا؟
بھارتی ایتھلیٹ نے کہا کہ ان کی ماں بھی دیگر ماؤں کی طرح ایک ماں کا احساس رکھتی ہیں، سادگی سے بولتی ہیں اور اپنے دل کی بات کرتی ہیں، انہوں نے اپنے دل کی بات کی ہے، کچھ لوگوں کو یہ عجیب لگا ہوگا اور کچھ نے اس کو پسند کیا ہو گا۔
اس سے قبل پیرس اولمپکس میں پاکستانی ایتھلیٹ ارشد ندیم کے گولڈ میڈل جیتنے پر بھارتی ایتھلیٹ نیرج چوپڑاکی والد ہ سروج دیوی نے بھارتی میڈیا کو انٹرویو دیتے ہوئے کہا تھا کہ ہم نیرج چوپڑا کے سلور میڈل جیتنے پر بھی خوش ہیں، ہمارے لیے سلور بھی گولڈ جیسا ہی ہے۔’ ارشد ندیم نے گولڈ میڈل جیتا وہ بھی میرا بیٹا ہے وہاں تک پہنچنے کے لیے سب محنت کرتے ہیں۔‘
