پیرس اولمپکس میں سونے کا تمغہ حاصل کرنے والے قومی ہیرو ارشد ندیم کا لاہور پہنچنے پر والہانہ استقبال کیا گیا۔ ارشد ندیم کی پرواز رات 1 بج کر 25 منٹ پر لاہور پہنچی۔ اس موقع پر ان کے طیارے کو واٹر کینن سلیوٹ پیش کرکے خوش آمدید کہا گیا۔
ہزاروں پرستار اپنے ہیرو کی جھلک دیکھنے کے لیے لاہور ایئر پورٹ پہنچے تھے، بینڈ نے دھنیں بکھیر کر ماحول میں اور جوش پیدا کر دیا۔ عوام نے ڈھول کی تھاپ پر بھنگڑے ڈالے اور پھولوں کی پتیاں بھی نچھاور کیں، خوشی میں جھومتے فینز نے سیلفیاں بھی لیں۔
وطن واپسی پر میڈیا سے گفتگو کرتے ہوئے ارشد ندیم نے کہا کہ قوم اور والدین کی دعاؤں سے اللہ تعالیٰ نے عزت دی، اس کامیابی کے پیچھے بہت لمبا سفر ہے، میڈل حاصل کرنے کے لیے دن رات محنت کی۔
مزید پڑھیں:ارشد ندیم کے طیارے کو وطن واپسی پر خصوصی واٹر کینن سلیوٹ پیش کیا گیا
اس موقع پر صحافی نے ارشد ندیم سے سوال کیا کہ کیا آپ بھی سیاست میں آئیں گے؟ سوال کا جواب دیتے ہوئے ارشد ندیم نے کہا کہ میرا جو کام ہے میں وہ ہی کروں گا، میرا سیاست میں آنا بنتا ہی نہیں ہے۔
واضح رہے کہ ارشد ندیم نے اولمپکس ریکارڈ کے ساتھ ساتھ جیولین تھرو مقابلے میں گولڈ میڈل جیتا ہے۔ انہوں نے 92.97 میٹر تھرو کرکے نیا اولمپک ریکارڈ قائم کیا ہے۔
مینز جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا۔ ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے ایتھلیٹ ہیں۔
