جوڈیشل مجسٹریٹ کراچی شرقی نے ایک خاتون ٹک ٹاک اسٹار کی نازیبا تصاویر وائرل کرنے کے مقدمے میں جرم ثابت ہونے پر ایک شخص کو مجموعی طور پر 9 سال قید کی سزا سنادی۔
یہ بھی پڑھیں: طالبات کی نازیبا ویڈیوز بنانے کا الزام، گرلزہاسٹل مالک کے خلاف مقدمہ درج
عدالت نے لطف علی کو 9 سال قید کی سزا سنانے کے علاوہ اس پر 60 ہزار روپے جرمانہ بھی عائد کیا۔ جرمانے کی عدم ادائیگی پر ملزم کو اضافی سزا بھگتنی پڑے گی۔
ٹک ٹاکر کے ساتھ اندوہناک واقعہ کیسے پیش آیا تھا؟
مدعی ٹک ٹاک اسٹار نے ایف آئی اے سائبر کرائم سرکل میں شکایت درج کروائی تھی۔ خاتون کے مطابق مجرم نے ایک پروجیکٹ میں ساتھ کام کرنے کے لیے اپنے گھر بلایا تھا جہاں جوس میں نشہ آور دوائی ملا کر پلادینے سے وہ اور ان کی والدہ بے ہوش ہوگئی تھیں۔
مزید پڑھیے: کوئٹہ: نازیبا ویڈیوز بنانے والے ملزمان کو 3، 3 سال قید کی سزا
خاتون نے یہ بھی بتایا تھا کہ ہوش میں آنے پر انہیں معلوم ہوا کہ ان کی غیر اخلاقی تصاویر لے لی گئیں ہیں جو ملزم کے موبائل میں محفوظ ہیں۔ بعد ازاں تصاویر دوسرے لوگوں سے بھی شیئر کردی گئیں۔
عدالت کا کہنا تھا کہ لطف علی نے خاتون کی تصاویر وائرل کرکے اس کے وقار کو مجروح کیا اور استغاثہ ملزم پر جرم ثابت کرنے میں کامیاب رہی ہے۔
مزید پڑھیے: لوگ میری نازیبا تصاویر سرچ کرتے ہیں، درِفشاں کا انکشاف
مجرم کو ایف آئی اے سائبر کرائم سرکل نے گرفتار کیا تھا اور اسے پیکا ایکٹ کے تحت سزائیں سنائی گئیں۔
