بھارت کی متنازع اداکارہ و سیاستدان کنگنا رناوت نے ایک بار پھر بالی ووڈ اداکاروں کو نشانے پر لیتے ہوئے انہیں بیوقوف، بدتمیز اور خودغرض قرار دے دیا۔
اپنے ایک حالیہ انٹرویو میں کنگنا رناوت کا کہنا تھا کہ وہ بالی ووڈ ٹائپ کی نہیں ہیں اور ان کی کسی بالی ووڈ سلیبرٹی سے دوستی نہیں ہوسکتی کیونکہ وہ لوگ برانڈڈ بیگز اور گاڑیوں کے علاوہ کوئی اور بات نہیں کرسکتے، ان کے پاس بات کرنے کے لیے کوئی موضوع نہیں ہوتا، نہ انہیں یہ معلوم ہوتا ہے کہ دنیا میں چل کیا رہا ہے، تو ایسے لوگوں سے دوستی کرنے کا کیا فائدہ؟
اداکارہ کی بات سُن کر میزبان نے کہا کہ تمام بالی ووڈ انڈسٹری ایک جیسی نہیں ہوسکتی، جس پر کنگنا نے کہا کہ انہوں نے بالی ووڈ کو بہت قریب سے دیکھا ہے انہیں معلوم ہے کہ یہاں سب ایک جیسے ہیں۔
ان کا کہنا تھا کہ اگر فنکار شوٹنگ نہ کر رہے ہوں تو ان کے پاس کوئی کام نہیں ہوتا، یہ فارغ ترین لوگ بن جاتے ہیں۔ صبح اٹھتے ہیں، ورزش کرتے ہیں، پھر سونا پھر اٹھنا، بس یہی معمول ہوتا ہے۔
اداکارہ نے بالی ووڈ پارٹیز کے بارے میں بات کرتے ہوئے کہا کہ لوگ سمجھتے ہیں کہ یہ پارٹیز بہت شاندار ہوتی ہیں لیکن یہ کسی صدمے سے کم نہیں ہوتیں، ان پارٹیز میں کوئی بھی اپنی شخصیت، ذہانت یا فن کے بارے میں بات نہیں کرتا۔ فنکاروں کی گفتگو صرف برانڈڈ بیگز یا گاڑیوں تک محدود ہوتی ہے اور انہیں آج تک بالی ووڈ میں کوئی ایسا فنکار نہیں ملا جو برانڈڈ چیزوں کے بارے میں بات نہ کرتا ہو۔
کنگنا رناوت کی بالی ووڈ فنکاروں کے بارے میں گفتگو سوشل میڈیا پر وائرل ہوئی تو صارفین اس پر مختلف تبصرے کرتے نظر آئے۔ ایک صارف نے لکھا کہ کنگنا نے بالی ووڈ اداکاروں کو بہت اچھے سے بیان کیا ہے۔
She describes bollywood so well 😂👏🏻
pic.twitter.com/PvG4lWfLfx— Mr Sinha (@MrSinha_) August 18, 2024
ایک صارف نے کنگنا کو تنقید کا نشانہ بناتے ہوئے کہا کہ جس انڈسٹری نے آپ کو شناخت دی آج آپ اسی کو تنقید کا نشانہ بنا رہی ہیں۔ ساتھ ہی انہوں نے بی جے پی کو بھی آڑے ہاتھوں لیا اور کہا کہ آپ اپنی جماعت میں ایسے لوگوں کی ہی مستحق ہیں۔
Barking such flith about the industry which gave u ur identity, or to say the least, u earned ur bread and butter from. This woman, who has a gutter mouth, can't even respect her own industry, BJP, u deserved this gem. https://t.co/jBai8nCfBC
— S (@the_reverie_) August 18, 2024
صارفین نے کنگنا کو آڑے ہاتھوں لیتے ہوئے کہا کہ ان کی تقریباً تمام فلمیں فلاپ ہوئی ہیں اسی لیے وہ بالی ووڈ کو تنقید کا نشانہ بناتی نظر آتی ہیں۔ جہاں کئی صارفین نے ان پر تنقید کی وہیں چند صارفین ایسے بھی تھے جن کا خیال تھا کہ کنگنا رناوت نے بالی ووڈ کو بہت قریب سے دیکھا ہے اس لیے وہ اتنے وثوق سے یہ سب باتیں کر رہی ہیں۔
خیال رہے کہ کنگنا رناوت کی فلم ‘ایمرجنسی’ کا ٹریلر حال ہی میں ریلیز ہوا ہے جس کی ہدایت کاری خود انہوں نے کی ہے۔
ٹریلر کی افتتاحی تقریب میں گفتگو کرتے ہوئے کنگنا رناوت نے بتایا کہ تینوں میں کوئی بھی خان ان کا پسندیدہ نہیں ہے، اگر کوئی خان پسند ہے تو وہ مرحوم عرفان خان ہے اور انہیں اس بات کا پچھتاوا ہے کہ وہ عرفان خان کے لیے فلم کی ہدایت کاری نہیں کرسکیں۔
