گورنر سندھ کامران ٹیسوری نے کہا ہے کہ ملک میں دہشتگردی کے واقعات بھارت کی ایما پر افغانستان سے ہورہے ہیں، ملک میں حالیہ دہشتگردی کے واقعات کے تانے بانے ’را‘ سے ملتے ہیں۔
کراچی میں میڈیا سے گفتگو کرتے ہوئے کہا گورنر سندھ کامران ٹیسوری نے کہا کہ ہمیں یہ دیکھنا ہوگا کہ جب جب پاکستان معاشی طور پر مستحکم ہورہا ہوتا ہے اور نفرتوں کے بیانیے سے نکل رہا ہوتا ہے، تو ملک میں دہشتگردی شروع ہوجاتی ہے، جس سے ملک کی سالمیت اور معیشت دونوں خطرے میں پڑجاتے ہیں۔
یہ بھی پڑھیں:کیا گورنر سندھ کامران ٹیسوری کو ہٹانے کا فیصلہ ہوچکا؟
گورنر سندھ نے کہا کہ فسادی نہیں چاہتے کہ پاکستان میں امن ہو، بلوچستان میں دہشتگردی کی سازش کے تانے بانے بھارت سے ملتے ہیں، تمام کارروائیاں بھارتی خفیہ ایجنسی را کی ایما پر افغانستان سے پاکستان میں کی جارہی ہیں، ایک مخصوص گروپ را کی ایما پر یہ کارروائیاں کررہا ہے۔
کامران ٹسوری نے کہا ’میں آرمی چیف جنرل عاصم منیر کو بتانا چاہتا ہوں کہ پوری قوم ریاست اور افواج پاکستان کے ساتھ کھڑی ہے، دہشتگردوں کے خلاف اسی طرح سے نمٹا جائے جس طرح یہ پاکستان کے خلاف سازشیں کررہے ہیں، ان سے آہنی ہاتھوں سے نمٹا جائے اور ان کا خاتمہ کیا جائے۔‘
یہ بھی پڑھیں: دہشتگردی میں ملوث ’را‘ کے 2ایجنٹس کراچی سے گرفتار
انہوں نے کہا کہ ملک سے دہشتگردی کا خاتمہ کرنا ہوگا، معاشرے کا ہرفرد بشمول تاجر یہ سمجھتا ہے کہ ملک کی ان سازشیوں سے جان چھڑانا ہوگی، جب میں ملک میں سی پیک کے منصوبوں پر تیزی آتی ہے، غیر ملکی سرمایہ کاری آتی ہے، ملک میں دہشتگردی کے واقعات ہوتے ہیں۔
ان کا کہنا تھا کہ اللہ تعالیٰ نے پاکستان کو آرمی چیف عاصم منیر کی صورت میں تحفہ دیا ہے، انہیں آگے بڑھ کر ایسی ملک دشمن قوتوں کو منہ توڑ جواب دینا ہوگا، جو ہماری معیشت اور معاشرت کے دشمن ہیں۔
