ملک کا سب سے بڑا انفارمیشن ٹیکنالوجی فیسٹول ’آئی ٹی سی این ایشیا‘ کا 25 واں ایڈیشن کراچی کے ایکسپو سینٹر میں جاری ہے۔
اس 3 روزہ نمائش میں گوگل، ٹک ٹاک، مائیکروسافٹ، ہواوے، پی ٹی سی ایل اور ایزی پیسہ سمیت 750 کمپنیاں حصہ لے رہی ہیں۔
آئی ٹی سی این ایشیا سے سرمایہ کاری اور کاروبار میں تقریباً 50 کروڑ ڈالر کی آمدنی متوقع ہے۔
بین الاقوامی معیار کی سائبر سیکیورٹی
فور سیکیور کمپنی سے وابستہ عبدالمنان نے وی نیوز سے گفتگو کے دوران کہا کہ ہم سائبر سیکیوریٹی فراہم کرتے ہیں اور اس نمائش سے فائدہ اٹھانے کے لیے ہم نے یہاں اسٹال لگایا ہے تاکہ ہم لوگوں تک اپنی مصنوعات پہنچا سکیں۔
یہ بھی پڑھیں: ’اے آئی‘ ٹیکنالوجی کے استعمال سے روزگار کے کون سے نئے مواقع پیدا ہو رہے ہیں؟
ان کا کہنا تھا کہ ہم جو سروسز فراہم کرتے ہیں وہ مقامی اور بین الاقوامی معیار کی ہیں اور یہ بنیادی طور پر چائنیز ٹیکنالوجی ہے جسے ہم مقامی طور پر اسمبل کرتے ہیں۔
گوگل کروم او ایس
صائمہ گل نے بتایا کہ کیسے لوگ گوگل کروم کو اپنے کاروبار سے منسلک کرکے فائدہ اٹھا سکتے ہیں۔
ان کا کہنا تھا کہ بچوں نے کس وقت کیا کیا، ان کی حاضری اور ان کے اسائنمنٹس وغیرہ سب آپ گوگل کروم سے مانیٹر کر سکتے ہیں۔
ٹک ٹاک پر اشتہارات کیسے لگ سکتے ہیں؟
کراچی ایکسپو سینٹر میں ایک اسٹال ٹک ٹاک کا بھی ہے جہاں پاکستان کی ایک کمپنی شہریوں کو یہ بتا رہی ہے کہ وہ کیسے اپنے برانڈ کی تشہیر ٹک ٹاک پر کرسکتے ہیں۔
لاکھوں روپوں کی کمپیوٹر کیسنگ
محمد سمیر نے بتایاکہ ان کا تعلق ایک ایسی کمپنی سے ہے جو کمپیوٹرز بنا کر دیتی ہے اور ان کے پاس کمپیوٹر کیسنگ کی قیمت 95 ہزار سے شروع ہوتی ہے۔
انہوں نے مزید بتایا کہ اگر مکمل گیمنگ پی سی بنانا ہو تو اس کی لاگت 20 لاکھ روپے تک پہنچ سکتی ہے۔
مزید پڑھیے: کراچی: روبوٹیک نمائش میں کم عمربچوں نے حیران کر دینے والی ٹیکنالوجیز متعارف کروا دیں
ایکسپو سینٹر میں ٹیکنالوجی سے متعلق ہر چیز دستیاب ہے اور شہریوں کو موبائل چارجر سے لے کر کمپیوٹر، سائبر سیکیوریٹی، ٹچ اسکرینز، پرنٹرز، ڈرونز یا کیمروں سمیت ہرشئے کے حوالے سے معلومات ایک ہی چھت کے نیچے مل سکتی ہیں۔
