لاہور ہائیکورٹ نے چیئرمین تحریک انصاف عمران خان کو عہدے سے ہٹانے کے لیے فائل چیف جسٹس کو بھجوا دی۔
لاہور ہائیکورٹ میں چیئرمین تحریک انصاف عمران خان کوپارٹی عہدے سے ہٹانے کی درخواست پر سماعت ہوئی، جسٹس مزمل اختر شبیرنے کیس کی سماعت کی،درخواست شہری محمد جنید نے ایڈووکیٹ آفاق احمد کی وساطت سے دائر کی ہے۔
دائر درخواست میں عمران خان،چیف الیکشن کمیشن سمیت دیگر کو فریق بنایا گیا ہے۔
درخواست گزار محمد جنید نے مؤقف اپنایا ہے کہ الیکشن کمیشن عمران خان کو این اے 95 میانوالی سے نااہل قرار دے چکا ہے، الیکشن کمیشن نے 7 دسمبر 2022 کو عمران خان کے خلاف قانون کاروائی کا آغاز کیا، توشہ خانہ کےحقائق چھپانے پر الیکشن کمیشن نے 21 اکتوبر 2022 کو عمران خان کو نااہل قرار دیا۔
درخواست گزار کے مطابق اس سے قبل سابق وزیر اعظم نواز شریف کو بھی عدالت نااہل کر چکی ہے، جس کے بعد نواز شریف پارٹی صدر نہیں رہے، نااہلی کے بعد کوئی پارٹی ہیڈ نہیں رہ سکتا۔
درخواست گزار نے عدالت سے استدعا کی کہ الیکشن کمیشن سے رجوع کیا مگر عہدے سے ہٹانے کی درخواست پر کوئی کاروائی نہیں کی گئی، عدالت عمران خان کو چیئرمین تحریک انصاف کے عہدے سے ہٹانے کا حکم دے۔
عدالت نے درخواست گزار کی استدعا پر کیس دوسرے بینچ منتقلی کے لیے فائل چیف جسٹس کو واپس بھجوا دی۔
