پاکستان کی معروف اداکارہ حمائمہ ملک نے بھارتی اداکار عمران ہاشمی کی پاکستان آمد پر ان کا استقبال کے حوالے سے بات چیت کی۔
حال ہی میں حمائمہ ملک نےاپنے بھائی و اداکار فیروز خان کے ہمراہ بھارتی صحافی فریدون شہریار کو آن لائن انٹرویو دیا جو سوشل میڈیا پر وائرل ہو گیا۔
دورانِ انٹرویو صحافی نے سوال کیا کہ اگر عمران ہاشمی پاکستان آئیں تو آپ کیا کریں گی؟ اس کے ساتھ صحافی نے 2 فرضی آپشنز دیے کہ ان کو ایئر پورٹ سے برقعہ پہنا کر لائیں گی تاکہ وہ لڑکیوں سے محفوظ رہیں یا پھر تمام خواتین کو گھروں میں رہنے کا کہیں گی؟
صحافی کے آپشنز سن کر اداکارہ نے کہا کہ میں تو تمام لڑکیوں کو بتا دوں گی کہ عمران ہاشمی آ رہے ہیں، آپ لوگ ایئر پورٹ چلے جائیں، اس طرح وہ توجہ حاصل کر کے خوش ہو جائیں گے۔
حمائمہ ملک کے مطابق برقعہ پہنا کر ایئر پورٹ سے لانے کے آپشن پر غور کیا جا سکتا ہے، یہ عمران ہاشمی کو پسند بھی آئے گا لیکن انہیں اپنا اسٹار ڈم بہت پسند ہے، انہیں اچھا لگتا ہے جب لوگ ان کے گرد جمع ہوتے ہیں۔
یہ بھی پڑھیں: حمائمہ ملک نے عمران ہاشمی کو مذہبی شخص کیوں کہا؟
اداکارہ نے کہا کہ وہ عمران ہاشمی سے بات کریں گی کہ ان کے ساتھ پوڈ کاسٹ کریں اور اگر کبھی عمران ہاشمی ان کے ساتھ پوڈ کاسٹ میں آئے تو ان سے پوچھیں گی کہ وہ اپنے آپ میں کیوں رہتے ہیں؟
دورانِ انٹرویو اداکارہ نے ایک سوال کا جواب دیتے ہوئے سنجے لیلیٰ بھنسالی کے ساتھ کام کرنے کی خواہش کا اظہار کیا۔ اور ان کا کہنا تھا کہ سلمان خان ان کے پسندیدہ اداکار ہیں۔
خیال رہے کہ حمائمہ ملک اور عمران ہاشمی نے 2014ء میں ریلیز ہونے والی فلم ’راجہ نٹور لال‘میں مرکزی کردار بھی ادا کیا تھا، جس کے بعد سے ان کی جوڑی کو بے حد پسند کیا جاتا ہے۔
