چیمپیئنز کپ ون ڈے ٹورنامنٹ میں پینتھرز نے ڈولفنز کو 50 رنز سے شکست دے دی۔ پینتھرز کے عثمان خان نے سنچری اسکور کی جس کی بدولت ٹیم کا مجموعی اسکور 328 ہوگیا، جواب میں ڈولفنز کی ٹیم 278 رنز ہی بنا سکی۔
فیصل آباد میں کھیلے گئے میچ میں پینتھرز کی جانب سے عثمان خان نے 111 رنز کی شاندار اننگز کھیلی، شاداب خان نے 65 اور حیدر علی نے 63 رنز اسکور کیے۔ ڈولفنز کے عثمان قادر نے 3، میر حمزہ اور عباس آفریدی نے 2، 2 جبکہ فہیم اشرف نے ایک وکٹ حاصل کی۔
مزید پڑھیں: چیمپیئنز ون ڈے کپ: 5 کپتانوں اور اسکواڈز کا اعلان، بابر اعظم کو کسی ٹیم کی قیادت نہیں ملی
جواب میں ڈولفنز کے اوپنرز صاحبزادہ فرحان اور محمد ہریرا نے پہلی وکٹ پر 66 رنز بنائے۔ صاحبزادہ فرحان 52 اور حریرا 39 رنز بناکر آؤٹ ہوئے۔ قاسم اکرم کے 65، اور فہیم اشرف کے 41 رنز کے علاوہ کوئی بیٹر نمایاں اننگز نہ کھیل سکا۔
پینتھرز کے محمد حسنین نے پانچ کھلاڑیوں کو آؤٹ کیا، مبصر خان اور اسامہ میر نے 2، 2 جبکہ شاداب خان نے ایک وکٹ حاصل کی۔ ڈولفنز کی پوری ٹیم 47 اوورز میں 278 رنز بناکر آؤٹ ہوگئی۔
یہ بھی پڑھیں: چیمپئنز ون ڈے کپ: ٹورنامنٹ کے افتتاحی میچ میں مارخورز نے پینتھرز کو شکست دے دی
اس سے قبل چیمپئنز ون ڈے کپ میں مارخورز کی ٹیم نے ٹورنامنٹ کے افتتاحی میچ میں پینتھرز کو 160رنز سے شکست دی تھی، مارخورز کے 347رنز کے ہدف کے جواب میں پینتھرز کی ساری ٹیم 187رنز ہی بنا سکی تھی۔ فیصل آباد میں کھیلے جانے والے میچ میں مارخور کے کامران غلام نے 115رنز کی اننگز کھیلی تھی۔
واضح رہے چیمپیئنز کپ ون ڈے ٹورنامنٹ کا آغاز ہوچکا ہے، اور تمام میچز فیصل آباد کرکٹ گراؤنڈ میں کھیلے جارہے ہیں۔
