وزیراعلی پنجاب مریم نواز شریف نے نجی ہاؤسنگ سوسائٹی کے مین ہول میں کمسن بچی کے گر کر جاں بحق ہونے کے واقعے کا سخت نوٹس لیتے ہوئے واقعے کی تحقیقات کرانے اور ذمہ داروں کا تعین کرنے کی ہدایت کر دی ہے۔
وزیراعلی پنجاب مریم نواز شریف نے کہا کہ نااہلی اور مجرمانہ غفلت پائی جائے تو ہاؤسنگ سوسائٹی سیل کردی جائے۔ تمام سوسائٹیوں میں کھلے مین ہولز کا معائنہ ہوگا، سرکاری حکام اور اداروں کو 3 دن کی ڈیڈ لائن دے دی۔
مزید پڑھیں:کراچی: گٹر میں گرنے سے 2 بچے جاں بحق، 3 زخمی
وزیراعلیٰ نے تمام نجی سوسائٹیوں کے علاوہ حکومتی کنٹرول میں آنے والے علاقوں میں بھی گٹروں کے ڈھکن چیک کرنے کا حکم دیا اور کہا کہ غفلت کے ذمہ داروں کا تعین کرکے سخت سزا دی جائے، عوام اور بچوں کی جان سے کھیلنے والوں کے لیے کوئی رعایت نہیں۔
یاد رہے کہ لاہور میں رائیونڈ روڈ پر نجی ہاؤسنگ سوسائٹی میں کمسن بچی پارک میں کھیلتے ہوئے کھلے مین ہول میں گر کر جاں بحق ہوگئی تھی۔ حادثہ مین ہول کا ڈھکن موجود نہ ہونے کے باعث پیش آیا تھا۔
