صوبہ خیبر پختونخوا کے وزیر تعلیم مینا خان آفریدی نے کہا ہے کہ کنٹینر اور رکاوٹیں ہمارا راستہ نہیں روک سکتیں، ہر حال میں لاہور جائیں گے، تمام تیاریاں مکمل کر رکھی ہیں۔
یہ بھی پڑھیں:پی ٹی آئی نے لاہور جلسے کے لیے جاری کیا گیا این او سی مسترد کردیا
جمعہ کو میڈیا کے نمائندوں سے گفتگو کرتے ہوئے وزیر تعلیم خیبر پختونخوا مینا خان آفریدی نے کہا ہے کہ وزیر اعلیٰ خیبر پختونخوا علی امین گنڈا پورکی ہدایت پر پی ٹی آئی کا قافلہ لاہور جلسہ میں شرکت کے لیے صوابی پہنچ چکا ہے، پشاورسے ہزاروں کی تعداد میں قافلہ لاہور جلسے میں جائے گا۔
انہوں نے کہا کہ لاہورمیں جلسہ کے لیے این او سی مل چکا ہے لیکن خدشہ ہے کہ خیبر پختونخوا کے قافلے کو مختلف رکاوٹیں کھڑی کر کے جلسہ میں شرکت سے روکا جائے گا۔ ہم بتانا چاہتے ہیں کہ ہم پاکستان کے پرامن شہری ہیں، ہم پاکستان کے بیٹے ہیں، جتنا کسی دوسری پارٹی کو جلسہ کرنے کا حق ہے اتنا ہی پاکستان تحریک انصاف کا بھی جلسہ کرنے کا حق ہے۔
یہ بھی پڑھیں علی امین گنڈپور کی معافی کی شرط پر پی ٹی آئی کو لاہور کے جلو پارک میں جلسہ عام کی اجازت مل گئی
آفریدی نے کہا کہ ہمیں پرامن طور پر جلسہ کرنے دیا جائے، اگر ہمیں جلسہ نہیں کرنے دیا جاتا تو ہمیں عمران خان کی این او سی مل چکی ہے، ہم ہر حال میں کل لاہور جلسہ میں جائیں گے، کنٹینر اور رکاوٹیں ہمارا راستہ نہیں روک سکتے، ہم نے اس کے لیے تیاریاں پوری کر رکھی ہیں، رکاوٹیں ہٹانے کے لیے کرینیں، واٹر بوزرز اور دیگر چیزیں صوابی پہنچ چکی ہیں۔
یہ بھی پڑھیں ’اٹک کراس کرکے دکھائیں گے‘، لاہور جلسہ کے لیے پی ٹی آئی کارکنوں کی تیاریاں، پش اپس بھی لگانے شروع کردیے
انہوں نے کہا کہ کل لاہور پہنچ کر ہم یہ ثابت کریں گے کہ جب بھی عمران خان کی کوئی کال ہوتی ہے تو پھر یہ قوم رکنے والی نہیں ہوتی، ہم جلسہ ہر حال میں کریں گے، اس لیے ہمارا مطالبہ ہے کہ ہمیں آزاد چھوڑ دیا جائے تاکہ ہم اپنا پرامن جلسہ منعقد کر سکیں۔
