بالی ووڈ اداکار شاہ رخ خان اور سلمان خان سدھارتھ آنند کی ہدایت کاری میں بنائی جانے والی نئی فلم Tiger vs Pathaanمیں ایک ساتھ کام کریں گے۔
ایک نئی رپورٹ کے مطابق سدھارتھ آنند یش راج فلمز(وائے آر ایف) Tiger vs Pathaanکی ہدایت کاری کریں گے۔ اس فلم میں شاہ رخ خان اور سلمان خان کو بھارتی جاسوس کے طور پر دکھایا جائے گا۔
دونوں اداکاروں نے اپنی فلموں پٹھان اور ٹائیگرمیں بھی ایجنٹ کا کردار ادا کیا تھا اوراس نئی فلم میں بھی دونوں بالی ووڈ اداکار اپنی اپنی فلموں میں نبھائے جانے والے کرداروں ہی میں نظر آئیں گے۔
فلم ’پٹھان ‘شاہ رخ خان کے کیرئیرکی سب سے بڑی کمرشل ہٹ فلم تھی۔اس ایکشن فلم میں شاہ رخ کو ایک ایجنٹ کے طور پر دکھایا گیا تھا۔
جبکہ سلمان خان نے بھی یش راج کی دو فلموں میں را کے ایجنٹ کا کردار ادا کیا تھا۔کبیر خان کی ہدایت کاری میں بننے والی پہلی فلم ’ایک تھا ٹائیگر‘جو 2012میں ریلیز ہوئی تھی۔ اسی فلم کا سیکوئل ’ٹائیگر زندہ ہے‘ جو علی عباس ظفر کی ہدایت کاری میں بنائی گئی تھی 2017میں ریلیز کی گئی تھی۔
سدھارتھ آنند کی ہدایت کاری میں بننے والی فلم’ پٹھان‘ میں سلمان خان مختصر کردار میں نظر آئے تھے۔فلم ’پٹھان‘2023میں انڈیا کی سب سے زیادہ کمائی کرنے والی فلم بھی ہے۔
