صوبہ خیبر پختونخوا کے ضلع سوات میں غیرملکی سفارت کاروں کے قافلے کی سیکیورٹی میں غفلت برتنے کے الزام میں انسپکٹر جنرل پولیس کے پی کے نے ڈپٹی انسپکٹر جنرل مالاکنڈ اورڈی پی او سوات کوعہدے سے ہٹا دیا ہے۔
یہ بھی پڑھیں:پاکستان کی 12 سفارتکاروں کو مالم جبہ حملے کی تحقیقات کی یقین دہانی
پولیس حکام کے مطابق بدھ کو انسپکٹرجنرل پولیس ( آئی جی ) اختر حیات خان نے سوات کے دورے کے دوران غیر ملکی سفارتکاروں کے قافلے کی سیکیورٹی میں غفلت برتنے کے الزام میں ڈی آئی جی محمد علی گنڈاپوراور ڈی پی او زاہد اللہ کوعہدے سے ہٹا دیا اور انہیں سی پی او آفس رپورٹ کرنےکی ہدایت کی گئی ہے۔
یہ بھی پڑھیں: مالم جبہ دھماکا: سی ٹی ڈی نے مقدمہ درج کرلیا، وزیراعلیٰ خیبر پختونخوا نے رپورٹ طلب کرلی
واضح رہے کہ 3 روز قبل 22 ستمبر کو سوات کے علاقے مالم جبہ میں غیرملکی سفارت کاروں کے قافلے میں شریک ایک پولیس وین کے قریب ریمورٹ کنٹرول دھماکا ہوا تھا جس کے نتیجے میں ایک پولیس جوان شہید اور 3 زخمی ہو گئے تھے۔ تاہم سفارتکار محفوظ رہے تھے۔
مزید پڑھیں: خیبر پختونخوا میں امن و امان کے بڑھتے ہوئے مسائل، قصور وار کون؟
واقعے کے بعد کے پی کے کی صوبائی حکومت نے تحقیقات کے لیے 2 رکنی کمیٹی قائم کی تھی، کمیٹی میں ایڈیشنل آئی جی انویسٹی گیشن اوراسپیشل سیکرٹری داخلہ شامل ہیں۔