جماعت اسلامی نے حکومت سمیت ملک کی تمام سیاسی جماعتوں کی قیادت سے رابطہ کرنے کا فیصلہ کرلیا۔
جماعت اسلامی کے ترجمان قیصر شریف کے مطابق جماعت اسلامی پاکستان کے امیر حافظ نعیم الرحمان نے اعلان کیا تھا کہ وہ حکومت اور ملک کی تمام سیاسی جماعتوں سے رابطہ کریں گے۔
یہ بھی پڑھیں: معاہدے پر عدم عملدرآمد: جماعت اسلامی نے ملک گیر دھرنوں کی کال دیدی
جماعت اسلامی یکم اکتوبر سے 7 اکتوبر تک ’ ہفتہ یکجہتی غزہ و لبنان‘ منا رہی ہے۔ اس ضمن میں 7 اکتوبر کو ملک بھر میں یوم یکجہتی غزہ و لبنان منایا جائے گا۔ یہ دن بالکل اسی طرز پر منایا جائے گا جس طرح 5 فروری کو ’یوم یکجہتی کشمیر‘ منایا جاتا ہے۔
ترجمان جماعت اسلامی کا کہنا ہے کہ اس حوالے سے تمام سیاسی جماعتوں سے رابطوں کا فیصلہ کیا گیا ہے اور حکومت سمیت سب جماعتوں کی قیادت سے ملاقاتیں ہوں گی۔
قیصر شریف کا کہنا ہے کہ ان رابطوں اور ملاقاتوں کا ایجنڈا صرف اور صرف غزہ اور لبنان سے یکجہتی ہی ہوگا۔
یہ بھی پڑھیں: حسن نصراللہ کو شہید کرنے کے لیے کیا حکمت عملی اختیار کی گئی؟
واضح رہے کہ امیر جماعت اسلامی کی اپیل پر آج 29ستمبر کو پورے ملک میں شاہراہوں پر دھرنے دینے کا فیصلہ کیا تھا جہاں حکومت کی جانب سے راولپنڈی معاہدہ پر عمل درآمد نہ کرنے پر ہونے والے احتجاج کیا جائے گا۔ علاوہ ازیں آج جماعت اسلامی حزب اللہ کے رہنما حسن نصراللہ شہید کی غائبانہ نماز جنازہ ادا کرنے کا اہتمام بھی کر رہی ہے۔ حزب اللہ کے سربراہ کو گزشتہ روز ایک بڑے اسرائیلی حملے میں شہید کردیا گیا تھا۔
