فیڈرل بورڈ آف ریونیو(ایف بی آر) میں ٹیکس جمع کرانے کے دوران سسٹم پر بوجھ بڑھنے کے باعث ٹیکس گوشوارے جمع کرانے کی آخری تاریخ میں توسیع کا امکان پیدا ہو گیا ہے۔
یہ بھی پڑھیں:ٹیکس گوشوارے داخل کرنے کی آخری تاریخ میں توسیع نہیں کی جائے گی، ایف بی آر
اتوار کو میڈیا رپورٹس کے مطابق ایف بی آر میں گوشوارے جمع کرانے کے دوران سسٹم پر بوجھ کے باعث گوشوارے جمع کرانے کا عمل سست روی کا شکار ہو گیا ہے جس کے باعث ٹیکس دہندگان کی جانب سے گوشوارے مقررہ تاریخ پر جمع کرانا مشکل ہو گیا ہے۔
رپورٹ کے مطابق فیڈرل بورڈ آف ریونیو نے وزیر اعطم شہباز شریف سے ٹیکس گوشوارے جمع کرانے کی تاریخ میں توسیع کی سفارش کرنے کا فیصلہ کیا ہے۔ وزیر اعظم کے واپس وطن پہنچنے پر تاریخ میں توسیع پر غور کیے جانے کا امکان ہے۔
مزید پڑھیں:ٹیکس جمع نہ کروانے والوں کے لیے بُری خبر، سموں کی منسوخی سمیت ایف بی آر کے بڑے فیصلے
واضح رہے کہ انکم ٹیکس گوشوارے جمع کرانے کی آخری تاریخ 30 ستمبرمقرر کی گئی تھی، گوشوارے جمع کرانے کی تاریخ میں محض 1 دن باقی رہ گیا ہے جبکہ ایف بی آر کا سسٹم بھی سست روی کا شکار ہے۔
ایف بی آر کی جانب سے جاری اعلامیے میں بتایا گیا ہے کہ عوامی سہولت کے لیے ایف بی آر کے فیلڈ دفاتر کا وقت بھی بڑھا دیا گیا ہے، ایف بی آر کے دفاتر رات 10 بجے تک کھلے رہیں گے جبکہ 30 ستمبر کو دفاتر رات 12 بجے تک کھلے رہیں گے۔
یہ بھی پڑھیں:ایف بی آر کا ٹیکس چوروں کے خلاف بڑی کارروائی کا منصوبہ، بھاری جرمانے عائد کرنے کی تجویز
ایف بی آر کے مطابق رواں سال 28 ستمبر تک 29 لاکھ گوشوارے جمع ہو چکے ہیں جب کہ گزشتہ سال 28 ستمبر تک 14 لاکھ گوشوارے جمع ہوئے تھے، اس طرح ٹیکس گوشوارے جمع کرانے کا عمل تا حال جاری ہے۔
