پاکستان مسلم لیگ (ن) کے مرکزی رہنما خواجہ سعد رفیق نے کہا ہے کہ وہ قائد ن لیگ نواز شریف کی گُڈ بک میں نہیں شامل نہیں تھے۔
سابق وزیراعلی پنجاب غلام حیدر وائیں کی یاد میں منعقدہ تقریب سے خطاب کرتے ہوئے رہنما ن لیگ سعد رفیق نے کہا کہ میں نواز شریف کی گُڈ بک میں نہیں تھا لیکن وائیں صاحب کا پیارا تھا، میں ان خوش قسمتوں میں سے ہوں جسے وائیں صاحب سے ڈانٹ نہیں پڑی، انہوں نے کہا کہ غلام حیدر وائیں نے سیاسی کیریئر میں میرا کافی ساتھ دیا، ضیاالحق اس وقت صدر پاکستان تھے، میں اس آمریت کے خلاف تھا، وائیں صاحب کو جن لوگوں نے مارا وہ ہارڈ کور کرمنلز تھے۔
یہ بھی پڑھیں: پانی سر تک آچکا لیکن کوئی جامع منصوبہ بندی نظر نہیں آرہی، سعد رفیق بلوچستان کے حالات پر بول پڑے
خواجہ سعد رفیق کا کہنا تھا کہ اسٹیبلشمنٹ کی حمایت سے سیاست کرنا اور اقتدار حاصل کرنا تمام سیاسی قائدین کا محبوب مشغلہ رہا ہے، اس راویت کو ختم کرنا ہو گا۔ انہوں نے کہا کہ اسٹیبلشمنٹ سیاسی جماعتوں کو بناتی ہے، جس سے کچھ مشکلات پیدا ہوتی ہیں، کوئی سیاسی جماعت اپنا منشور پڑھنے کی بھی روادار نہیں، غلطی چند لوگ کرتے ہیں، سزا ساری جماعت کو ملتی ہے، یہ جو پارٹی رگڑا کھا رہی، یہ لوگ بھی اسی وجہ سے اس موڑ پر کھڑے ہیں۔
ن لیگی رہنما نے مزید کہا کہ لوگ سمجھتے ہیں کہ بانی پی ٹی آئی، مسلم لیگ ن اور اسٹیبلشمنٹ کی لڑائی بڑی ہے، حقیقت یہ ہے کہ بلوچستان کا مسئلہ سب سے اہم مسئلہ ہے، آئین پاکستان کو تسلیم کرنے والی جماعتوں کو ایک ساتھ بیٹھنا ہو گا کیونکہ آج یہی دست و گریبان ہیں۔ انہوں نے کہا کہ سیاسی جماعتیں گراس روٹ لیول پر سیاست کیوں نہیں کرتیں، آج عدلیہ کے جج متنازع ہوگئے، ریاستی اداروں کو بھی سوچنا ہوگا، پاکستان کے خلاف بیرونی سازشوں سے بچنا ہے تو ہمیں متحد ہونا پڑے گا۔
