پاکستان تحریک انصاف کے جنرل سیکرٹری اسد عمر نے کہا ہے کہ گزشتہ روز قومی اسمبلی میں اقلیت نے قرار داد پاس کی،342 لوگوں کے ہاوس میں ٹوٹل 42بندے بھی نہیں تھے۔
رہنما تحریک انصاف اسد عمر نے انسداد دہشتگردی کی عدالت کے باہر صحافیوں سے گفتگو کرتے ہوئے کہا کہ گزشتہ روز پارلیمنٹ میں دھواں دھار آئین کے منافی تقاریر کی گئیں اور اقلیتی فیصلہ کیا گیا جس کی حیثیت ردی کی ٹوکری ہے۔ پاکستان میں آئین کی حکمرانی برقرار رہے گی۔ انہوں نے کہا کہ یہ پہلے صرف عمران خان سے ڈرتے تھے اب پاکستانی عوام سے بھی ڈرتے ہیں۔
اسد عمر نے دعویٰ کیا کہ پاکستان میں آئین کی حکمرانی برقرار رہے گی اور پاکستان جلد الیکشن کی طرف جائے گا اور اس بات میں کوئی شک نہیں ہے کہ عمران خان وزیر اعظم بنیں گے۔ الیکشن کمیشن کا فیصلہ خوش آئیند ہے۔ انہوں نے کہا کہ ہم عدلیہ کے فیصلہ پر عمل درآمد کریں گے۔
اسد عمر کا مزید کہنا تھا کہ ایک صدی کے سب سے بڑا کرائسز کورونا کے دوران عمران خان نے کیسے ملک کا دفاع کیا یہ سب کے سامنے ہے،، عمران خان جب گیا تھا تو مہنگائی کی شرح بارہ فیصد تھی اور آج 45فیصد کو پہنچ گئی ہے۔
