پاکستان کرکٹ بورڈ (پی سی بی) نے قومی سلیکشن کمیٹی از سرِنو تشکیل دینے کی خبریں سامنے آرہی ہیں۔ پی سی بی کی جانب سے نئے ناموں میں علیم ڈار، اظہرعلی اور عاقب جاوید کو شامل کیا گیا ہے۔
میڈیا رپورٹس کے مطابق ابھی تک پی سی بی نے اس حوالے سے کوئی باضابطہ اعلان نہیں کیا لیکن جلد سلیکشن کمیٹی کا باضابطہ اعلان متوقع ہے۔ سابق کرکٹر اور سابق آئی سی سی امپائر علیم ڈار بھی سلیکشن کمیٹی کا حصہ ہوں گے۔
مزید پڑھیں: پی سی بی نے بابر اعظم کا کپتانی سے استعفیٰ منظور کرلیا
رپورٹس کے مطابق کمیٹی میں حسن چیمہ ڈیٹا اینالسٹ کے طور پر شامل ہوں گے، اس کے علاوہ سابق فاسٹ بولر عاقب جاوید کو کنوینر، اور سابق کپتان اظہر علی کو یوتھ ڈیولپمنٹ کی ذمہ داری ملنے کا امکان ہے۔
خیال رہے کہ محمد یوسف نے 2 ہفتے قبل سلیکٹر کے عہدے سے استعفیٰ دیا تھا اور چیئرمین پی سی بی نے چند روز قبل سلیکشن کمیٹی ازسر نو تشکیل دینے کا اعلان کیا تھا۔ تاہم، گرین شرٹس کے دورہ آسٹریلیا کے لیے پاکستانی ٹیم کا اعلان نئی سلیکشن کمیٹی کرے گی۔
مزید پڑھیے: قومی کرکٹ ٹیم کے سلیکٹر محمد یوسف عہدے سے مستعفی
دوسری جانب سابق کرکٹر سلیم یوسف کو 7ماہ بعد ہونے والے ہانگ کانگ سپر سکسز ٹورنامنٹ کے لیے ٹیم کا مینجر مقرر کیا گیا ہے۔
واضح رہے اظہر علی، عاقب جاوید، مشتاق احمد، اور سلیم یوسف کے ساتھ ابتدائی مشاورت گزشتہ ہفتے ہوئی تھی، اس سے قبل عاقب جاوید نیشنل کرکٹ اکیڈمی (این سی اے) میں بھی فرائض نبھا چکے ہیں۔ تاہم، اسد شفیق بطور سلیکٹر کام جاری رکھیں گے۔
