وزیراعظم پاکستان شہباز شریف نے کہا ہے کہ دھرنوں کی سیاست نے ملکی معیشت کو اربوں ڈالر کا نقصان پہنچایا، حال ہی میں ایک صوبے کی طرف سے وفاق پر لشکر کشی کی گئی، جو غیرآئینی اور غیرقانونی اقدام تھا۔ ایک طرف ملکی ترقی اور دوسری جانب جتھے وفاق پر چڑھائی کررہے ہیں، پیٹرول بم اور گالم گلوچ جنونی جتھے کا وتیرہ بن چکا ہے۔
اسلام آباد پولیس لائنز ہیڈکوارٹرز میں تقریب سے خطاب کرتے ہوئے انہوں نے کہاکہ ملک میں دھرنوں کی سیاست کا آغاز 2014 سے ہوگیا تھا جب ڈی چوک میں فسادیوں نے دھرنے دیے اور وہاں قبریں کھودی گئیں۔
یہ بھی پڑھیں سیاسی مخالفین کو قومی معیشت میں بہتری ہضم نہیں ہو رہی، وزیراعظم شہباز شریف
شہباز شریف نے کہاکہ 2014 میں چینی صدر نے پاکستان کا دورہ کرنا تھا لیکن فسادیوں کے احتجاج کی وجہ سے انہیں دورہ منسوخ کرنا پڑا۔
انہوں نے کہاکہ فسادیوں کی بدترین خواہش تھی کہ لاشیں گریں اور یہ آگ ملک بھر میں پھیلے لیکن اسلام آباد پولیس اور رینجرز نے ایسی تمام سازشیں ناکام بنائیں۔
انہوں نے کہاکہ پنجاب، سندھ اور بلوچستان پولیس میں اصلاحات لائی جارہی ہیں، اگر خیبرپختونخوا کو وفاق کی کسی بھی مدد کی ضرورت ہے تو اس کے لیے حاضر ہیں۔
اسلام آباد پولیس کی تنخواہیں وفاق کے برابر کرنے کا اعلان
وزیراعظم نے اپنے خطاب کے دوران اسلام آباد پولیس کی تنخواہیں پنجاب کے برابر کرنے کا اعلان کردیا، اس کے علاوہ انہوں نے اسلام آباد انتظامیہ اور پولیس کے افسران کو ایگزیکٹو الاؤنس دینے کا بھی اعلان کیا۔
انہوں نے کہاکہ اسلام آباد پولیس کے شہید ہونے والے 64 افسران اور جوانوں میں سے صرف 20 کو شہدا پیکج ملا تھا، اب رہ جانے والے 44 شہدا کو پیکج جلد مل جائے گا۔
انہوں نے کہاکہ سیف سٹی کو سمارٹ سٹی بنانے کے لیے میری بات ہوچکی ہے، وزیر داخلہ سے امید ہے ان تمام منصوبوں عملی جامہ پہنانے کے لیے کردار ادا کریں گے۔
انہوں نے کہاکہ پولیس کو میڈلز دینے کا منصوبہ بھی بحال کردیا گیا ہے، اور تمام کیسز یکسو کیے جائیں گے۔
وزیراعظم کا پولیس سپاہی عبدالحمید شاہ شہید کو خراج عقیدت پیش
انہوں نے حال ہی میں احتجاج کے دوران شہید ہونے والے پولیس سپاہی عبدالحمید شاہ کو خراج عقیدت پیش کرتے ہوئے کہاکہ اسلام آباد پولیس کے تمام افسروں اور جوانوں کی بہادری قابل تعریف ہے۔
یہ بھی پڑھیں پولیس نے دہشتگردی کے خلاف جنگ میں ہراول دستے کی ذمہ داری نبھائی، وزیراعظم شہباز شریف
وزیراعظم نے وزیر داخلہ کو مخاطب کرتے ہوئے کہاکہ اگر اسلام آباد پولیس میں افسران اور جوانوں کی کمی ہے تو فی الفور میرٹ کی بنیاد پر بھرتیاں کی جائیں۔
