سعودی وزارت داخلہ نے منشیات کی اسمگلنگ اور فروخت میں ملوث ایک مجرمانہ نیٹ ورک کی نشاندہی اور اس کے خاتمے کا اعلان کیا ہے۔
یہ بھی پڑھیں: سعودی سرمایہ کاروں کا دورہ، پاکستانیوں کے لیے خوشخبری
اس حوالے سے کی گئی کارروائی میں 21 افراد کو گرفتار کیا گیا جن میں 16 مختلف سرکاری محکموں کے اہلکار شامل ہیں اور ان کا تعلق وزارت داخلہ، نیشنل گارڈ، وزارت دفاع، بلدیات اور وزارت انصاف سے بتایا گیا ہے۔
حکام کے مطابق گرفتار افراد کے خلاف ضروری قانونی کارروائیاں مکمل کر کے انہیں استغاثہ کے حوالے کر دیا گیا ہے۔ نیٹ ورک کے مجرمانہ کردار میں ممنوعہ اشیا کی اسمگلنگ، منشیات کا تبادلہ اور اس کی غیر قانونی فروخت شامل تھی۔ مزید تحقیقات سے معلوم ہوا کہ اسمگل شدہ مواد کو مملکت سے باہر لے جا کر فروخت کیا جاتا تھا۔
مزید پڑھیے: سعودی عرب کی مکمل فنڈڈ انٹرن شپ کیسے حاصل کی جا سکتی ہے؟
وزارت داخلہ نے واضح کیا ہے کہ ملک کی سلامتی اور استحکام سے کھیلنے کی اجازت کسی کو نہیں دی جائے گی۔ سیکیورٹی ادارے پوری مستعدی کے ساتھ تمام مجرمانہ سازشوں کے خلاف سرگرم ہیں اور ملک کے نوجوانوں کو منشیات کی لعنت سے بچانے کے لیے پرعزم ہیں۔
یہ کارروائی سعودی حکومت کے انسداد منشیات کے عزم کو مزید مضبوط بناتی ہے تاکہ معاشرتی سلامتی کو یقینی بنایا جا سکے۔
