ایران کی فضائیہ کے سربراہ بریگیڈئیر جنرل حمید واحدی 2 روزہ دورے پر اسلام آباد پہنچ گئے۔
سفارتی ذرائع کے مطابق بریگیڈئیر جنرل حمید واحدی پاک فضائیہ کے سربراہ ایئر چیف مارشل ظہیر احمد بابر کی دعوت پر پاکستان کا دو روزہ دورہ کر رہے ہیں۔
یہ بھی پڑھیں: جنرل عاصم منیر کا دورہ ایران: جغرافیائی سالمیت کے لیے مل کر کام کرنے پر اتفاق
نور خان ایئر بیس پہنچنے پر پاک فضائیہ کے حکام اور ایرانی سفیر رضا امیری مقدم نے بریگیڈئیر جنرل حمید واحدی کا استقبال کیا۔ اس موقعے پر ایرانی سفارتخانے کے کرنل محمد محسن شہابی بھی موجود تھے۔
ایرانی فضائیہ کے سربراہ حمید واحدی کل مصحف علی میر ایئر بیس کا دورہ کریں گے اور پاک فضائیہ کی بین الاقوامی فضائی مشقوں ’انڈس شیلڈ 2024‘ کا معائنہ کریں گے۔
ذرائع کا کہنا ہے کہ دورے کے دوران ایران کی فضائیہ کے سربراہ کی پاکستان کی اعلیٰ عسکری و فضائی قیادت سے ملاقاتیں ہوں گی اور وہ مسلح افواج کے سربراہ جنرل سید عاصم منیر سے بھی ملاقات کریں گے۔
مزید پڑھیے: ایران کی جانب سے فائر کیے گئے میزائل فضائی اڈوں پر گرے، اسرائیلی فوج کا اعتراف
ایئر ہیڈ کوارٹرز میں ان کی پاک فضائیہ کے سربراہ ایئر چیف مارشل ظہیر احمد بابر سے بھی ملاقات ہو گی۔ ان ملاقاتوں میں دونوں مسلح افواج بالخصوص فضائیہ میں تعاون کے فروغ پر خصوصی تبادلہ خیال ہو گا۔
ایرانی فضائیہ کے سربراہ نے فروری 2022 میں بھی پاکستان کا 4 روزہ دورہ کیا تھا۔ موجودہ صورتحال اور اسرائیل کی جانب سے جوابی حملے کے خدشات کے تناظر میں ایرانی فضائیہ کے سربراہ کا دورہ پاکستان خاصی اہمیت کا حامل ہے۔
