پاکستان کرکٹ ٹیم کے سابق کھلاڑی اور مایہ ناز اوپنر سعید انور نے اپنے مداحوں کو ایک پیغام میں کہا ہے کہ ان کا کوئی سوشل میڈیا اکاؤنٹ نہیں لہٰذا وہ ایسے اکاؤنٹس سے چلنے والی خبروں اور معلومات کو سچ نہ مانیں بلکہ انہیں مسترد کردیں۔
پاکستان ٹیم کے سابق وکٹ کیپر بیٹر راشد لطیف نے اس حوالے سے سماجی رابطے کی ویب سائٹ ’ایکس‘ پر سابق پاکستانی اوپنر سعید انور کی ایک ویڈیو شیئر کی ہے جس میں سعید انور لوگوں کو اپنا پیغام دے رہے ہیں۔ راشد لطیف نے سعید انور کے نام پر بنے جعلی ایکس اکاؤنٹ @ImSaeedAnwar کو بھی ختم کرنے کی اپیل کی۔
یہ بھی پڑھیں: بڑھتی طلاقوں کی ذمہ دار خواتین ہیں، سابق کرکٹر سعید انور اپنے بیان پر تنقید کی زد میں
اپنے ویڈیو پیغام میں سعید انور نے کہا، ’اللہ نے ہمیں ایک خوبصورت دین عطا فرمایا ہے جس میں اس نے دنیا و آخرت کی ہر کامیابی رکھی ہے، اللہ کے رسول حضرت محمد ﷺ نے فرمایا کہ میرا امتی ہر گناہ کرسکتا ہے لیکن جھوٹ نہیں بول سکتا اور دھوکا نہیں دے سکتا، جھوٹ انسانی فطرت ہے، اللہ نے قرآن میں فرمایا کہ میں جھوٹے کو ہدایت نہیں دیتا۔‘
Please remove Saeed Anwar account 🙏🏾@ImSaeedAnwar thanks pic.twitter.com/VroA4ldsmK
— Rashid Latif | 🇵🇰 (@iRashidLatif68) October 31, 2024
سعید انور نے اپنے پیغام میں کہا، ’میرے نام سے کچھ لوگوں نے فیس بک، ایکس اور دیگر سوشل میڈیا پلیٹ فارمز پر اکاؤنٹس کھول رکھے ہیں اور نجانے کون کون سے الٹی سیدھی خبریں لوگوں کو بتا رہے ہیں۔‘
انہوں نے عوام سے اپیل کی کہ جو بھی ایسی خبریں دیکھے انہیں سچ نہ مانے اور مسترد کردے کیونکہ میرا کوئی سوشل میڈیا اکاؤنٹ نہیں ہے۔ انہوں نے عوام سے کہا کہ ان کا یہ پیغام پھیلا دیں تاکہ اس جھوٹے شخص کی پکڑ کی جائے۔
یہ بھی پڑھیں: میچ فکسنگ کے الزامات پر کھلاڑیوں سے قرآن پاک پرحلف لیا، سابق کپتان انتخاب عالم
انہوں نے کہا کہ 3 قسم کے ایمان ہیں، گناہ کو دیکھ کر ہاتھ سے روکنا، اتنی قدرت نہ ہو تو زبان سے روکے اور اگر زبان سے بھی نہ روک سکے تو دل میں برا جانے، اس کے بعد کوئی ایمان نہیں۔ انہوں نے اپیل کی کہ لوگ ان کے نام سے جھوٹے اکاؤنٹس بنانے والے کو پکڑیں۔
