پی ڈی ایم اے نے 25 مارچ سے اب تک ہونے والی بارشوں کے باعث خیبرپختونخوا کے مختلف اضلاع میں جانی و مالی نقصانات کی تازہ رپورٹ جاری کر دی ہے۔
رپورٹ کے مطابق بارشوں کے باعث گھروں کی چھتیں اور دیواریں گرنے سے اب تک 25 افراد جاں بحق جبکہ 77 افراد زخمی ہوئے ہیں۔
جاں بحق ہونے والوں میں 18 بچے، 2 مرد اور 5 خواتین شامل ہیں جبکہ زخمیوں میں 33 مرد، 9 خواتین اور 35 بچے شامل ہیں۔
یہ بھی پڑھیے: بلوچستان میں شدید بارشوں کے بعد سیلابی صورتحال، مسافر وین اور ٹرک ریلے میں بہہ گئے
پی ڈی ایم اے کے مطابق مجموعی طور پر 88 گھروں کو نقصان پہنچا ہے جن میں 71 گھروں کو جزوی جبکہ 17 گھر مکمل طور پر منہدم ہو گئے ہیں۔
یہ حادثات صوبے کے مختلف اضلاع بنوں، ایبٹ آباد، کوہاٹ، پشاور، نوشہرہ، باجوڑ، لکی مروت، کرم، ہنگو، شانگلہ، بونیر، مالاکنڈ، اپر دیر، بٹگرام، شمالی وزیرستان اور ٹانک میں پیش آئے۔
پی ڈی ایم اے، ریسکیو 1122، ضلعی انتظامیہ اور دیگر متعلقہ ادارے امدادی سرگرمیوں میں مصروف ہیں اور باہمی رابطے میں ہیں۔
ڈائریکٹر جنرل پی ڈی ایم اے نے متاثرہ اضلاع کی انتظامیہ کو ہدایت کی ہے کہ متاثرین کو فوری امدادی سامان فراہم کیا جائے جبکہ جاں بحق افراد کے لواحقین کو مالی امداد جلد از جلد دی جائے۔
یہ بھی پڑھیے: پاکستان اور افغانستان میں شدید بارشیں اور سیلاب، کم از کم 45 افراد جاں بحق
رپورٹ میں مزید کہا گیا ہے کہ صوبے کے مختلف اضلاع میں بارشوں کا سلسلہ وقفے وقفے سے جاری ہے اور یکم اپریل سے 4 اپریل تک مزید بارشوں کا امکان ہے۔
پی ڈی ایم اے نے عوام سے اپیل کی ہے کہ غیر ضروری سفر سے گریز کریں، حساس سیاحتی مقامات کا رخ نہ کریں اور حکومتی ایڈوائزری پر عمل کریں۔
ترجمان پی ڈی ایم اے کے مطابق ایمرجنسی آپریشن سنٹر مکمل طور پر فعال ہے اور شہری کسی بھی ناخوشگوار واقعے یا موسمی صورتحال سے متعلق معلومات کے لیے ہیلپ لائن 1700 پر رابطہ کر سکتے ہیں۔
