بھارتی کرکٹ ٹیم کے سابق کھلاڑی اور کرکٹ تجزیہ کار سنیل گواسکر نے بھارتی کرکٹ بورڈ سے مطالبہ کیا ہے کہ آسٹریلیا کے خلاف ٹیسٹ سیریز میں روہت شرما کی جگہ جسپریت بمراہ کو ٹیم کا کپتان مقرر کیا جائے۔
بھارتی نیوز چینل کے پروگرام میں گفتگو کرتے ہوئے سنیل گواسکر نے کہا کہ کپتان کے لیے پہلا ٹیسٹ کھیلنا ضروری ہوتا ہے، اگر وہ انجری کا شکار ہوجاتا ہے تو یہ الگ بات ہے لیکن سیریز کے پہلے ہی ٹیسٹ میچ میں اگر کپتان دستیاب نہیں اور اس کی جگہ نائب کپتان کو ٹیم کی قیادت سونپ دی جائے تو اس پر دباؤ بڑھتا ہے، نائب کپتان کے لیے کپتانی کی ذمہ داری لینا آسان نہیں ہوگا۔
یہ بھی پڑھیں: نیوزی لینڈ نے تیسرا ٹیسٹ میچ جیت لیا، 24 سال بعد بھارت کو گھر میں وائٹ واش کا سامنا
انہوں نے کہا کہ خبروں میں پڑھا ہے کہ روہت شرما آسٹریلیا کے خلاف سیریز کے پہلے اور دوسرے میچ میں نہیں کھیلیں گے، اگر ایسی بات ہے تو بھارتی سلیکشن کمیٹی کے چیئرمین اجیت اگرکر کو چاہیے کہ وہ نائب کپتان کو پورے ٹور کی ذمہ داری دیں، اس حوالے سے فیصلہ بالکل واضح ہونا چاہیے۔
https://Twitter.com/_FaridKhan/status/1853496403974369353?t=iyGOe3ZISe280zrSWdLkxQ&s=19
سنیل گواسکر نے کہا کہ نیوزی لینڈ کے خلاف حالیہ ٹیسٹ سیریز میں بھارت کو 0-3 سے شکست ہوئی ہے تو ایسی صورت میں اگلی سیریز کے لیے ٹیم کا لیڈر ہونا ضروری ہے، اگر روہت شرما ایک دو میچز کے لیے بطور کپتان دستیاب نہیں تو انہیں بقیہ سیریز کے بقیہ میچز میں بطور کھلاڑی شریک کیا جانا چاہیے۔
یہ بھی پڑھیں: چیمپیئنز ٹرافی، بھارتی کرکٹ ٹیم کے میچ اب کن شہروں میں ہوں گے؟ نئی تجویز سامنے آگئی
واضح رہے کہ بھارت اور آسٹریلیا کے درمیان 5 ٹیسٹ میچز کی سیریز 22 نومبر 2024 سے 3 جنوری 2025 تک آسٹریلیا میں کھیلی جائے گی۔ اس سیریز کے لیے روہت شرما کو بھارتی ٹیم کا کپتان جبکہ جسپریت بمراہ کو نائب کپتان مقرر کیا گیا ہے۔ تاہم بھارتی میڈیا کا کہنا ہے کہ کپتان روہت شرما پہلے اور دوسرے ٹیسٹ کے لیے دستیاب نہیں ہوں گے۔
