وفاقی وزیر خزانہ محمد اورنگزیب نے کہا ہے کہ حکومت مرغی اور دالوں کی قیمتوں میں اضافہ برداشت نہیں کرے گی اور یقینی بنائے گی کہ مڈل مین عوام کو فائدہ پہنچانے میں رکاوٹ نہ بنے۔
کراچی میں فیوچر سمٹ سے خطاب کرتے ہوئے وفاقی وزیر خزانہ محمد اورنگزیب نے کہا کہ دالوں کی قیمت میں 60 فیصد اور چکن کی قیمت میں 15 فیصد اضافہ کیوں ہوا ہے، اب یہ معاملہ اقتصادی رابطہ کمیٹی کے ہر اجلاس میں آئے گا، پرائس کمیٹیوں سے کوآرڈینیشن ہوگی، پوری دنیا میں مرغی اور دالوں کی قیمتیں کم ہوئی ہیں مگر پاکستان میں نہیں ہوئیں۔
یہ بھی پڑھیں: وفاقی وزیر خزانہ کا دورہ امریکا، پاکستان کی آئی ایم ایف سے ایک ارب ڈالر فنڈنگ کی باقاعدہ درخواست
وزیر خزانہ کا کہنا تھا کہ ہم صحیح سمت میں جا رہے ہیں لیکن ابھی طویل سفر باقی ہے۔ انہوں نے کہا کہ ترسیلات زر میں اضافہ ہورہا ہے اور زرمبادلہ کے ذخائر بھی مستحکم ہیں، رواں مالی سال کریڈٹ ریٹنگ بی کروانا چاہتے ہیں، صنعت کاروں کو سمجھنا چاہیے کہ ان کا ریفرنس پوائنٹ کائبور ہے۔
انہوں نے کہا کہ مانیٹری پالیسی کمیٹی نے شرح سود میں ڈھائی فیصد کمی کی ہے، مالی سال کے 4ماہ میں اہداف کے حوالے سے چیزیں بہت بہتر ہورہی ہیں۔ کراچی انٹر بینک آفر ریٹ اس وقت 13 فیصد تک آگیا ہے۔
محمد اورنگزیب نے مزید کہا کہ ڈیجیٹائزیشن کے ذریعے انسانی مداخلت کم اور کرپشن قابو کریں گے، اب صنعتوں کو مراعات کے بغیر اہداف نہیں دیں گے۔ ہم غیر ملکی مہمانوں کے لیے ویزا سہولت آن لائن کر رہے ہیں۔ پاکستان میں میکرو اکنامک استحکام دیکھا جارہا ہے، پاکستان کے دوہرے خسارے میں بہتری آرہی ہے۔
یہ بھی پڑھیں: تمام اسٹیک ہولڈرز کو پیغام دیدیا حکومت مزید قرض حاصل کرنے کی خواہشمند نہیں، وزیر خزانہ محمد اورنگزیب
انہوں نے کہا کہ نجی شعبے کی استعداد بڑھانا ہوگی، اپنی معیشت کو برآمدات پر مبنی اکانومی کے ذریعے بدلنا ہو گا۔ انہوں نے کہا کہ آبادی کا بڑھنا ایسا بم ہے جو پھٹ چکا ہے۔
