وزیرِ اعظم شہباز شریف کی ہدایت پر آج ملک بھر میں نمازِ استسقا کے اہتمام کا سرکلر جاری کردیا گیا ہے۔ وزارتِ مذہبی امور کی جانب سے وفاق اور صوبائی سطح پر نمازِ استسقا کے اہتمام کی ہدایت کی گئی ہے۔
چاروں صوبوں، گلگت بلتستان اور آزاد کشمیر کے سیکریٹری اوقاف کو اس حوالے سے عملدرآمد یقینی بنانے کی ہدایت کی گئی ہے۔ وزارتِ مذہبی امور کی جانب سے کہا گیا ہے کہ خشک سالی سے ملک میں صحت اور اسموگ کے مسائل ہیں، مساجد کے امام اور عوام نمازِ استسقا کا لازمی اہتمام کریں۔
مزید پڑھیں:وزیر اعظم شہباز شریف کی قوم سے نمازِ استسقا کی ادائیگی اور بارش کے لیے دعا کی اپیل
وزارتِ مذہبی امور کی جانب سے کہا گیا ہے کہ عوام اللّٰہ تعالیٰ سے مغفرت طلب کرتے ہوئے بارانِ رحمت کی دعا کریں۔ اس سے قبل وزیرِ اعظم محمد شہباز شریف نے قوم سے بارانِ رحمت کے لیے نمازِ استسقا ادا کرنے کی اپیل کی تھی۔
وزیرِ اعظم نے اپنے بیان میں قوم سے درخواست کی تھی کہ نمازِ استسقا ادا کرے اور اللّٰہ تعالیٰ سے بارانِ رحمت کے لیے خصوصی دعا مانگی جائے۔ وزیرِ اعظم نے کہا تھا کہ علمائے کرام اور مشائخ عظام خاص طور پر نمازِ استسقاء کے اہتمام میں اپنا کردار ادا کریں۔
