سینئر اداکارہ لیلیٰ زبیری نے انکشاف کیا ہے کہ انہیں ماضی میں بالی ووڈ کے مقبول اداکار راج کپور نے فلم میں کام کرنے کی پیش کش کی تھی لیکن انہوں نے کام کرنے سے انکار کردیا تھا۔
لیلیٰ زبیری حال ہی میں مزاحیہ پروگرام ’ہنسنا منع ہے‘ میں شرکت کی جہاں انہوں نے مختلف موضوعات پر بات کی، ایک سوال کے جواب میں اداکارہ نے بتایا کہ ماضی میں شارجہ کپ میں انہیں مدعو کیا گیا تھا جہاں ان کی ملاقات راج کپور سے ہوئی۔
یہ بھی پڑھیں: ٹک ٹاکرز کی نازیبا ویڈیوز لیک ہونے پر مشی خان میدان میں آگئیں، خواتین کو اہم مشورہ
لیلیٰ زبیری نے بتایا کہ میچ کے دوران ان کی اور راج کپور کی تصاویر کھینچی گئیں تو بھارتی اداکار نے ان تصاویر پر آٹو گراف مانگا اور بتایا کہ وہ اپنی پونا اکیڈمی میں لیلیٰ زبیری کے ڈرامے دکھاتے ہیں تاکہ شاگردوں کو اداکاری سکھائی جائے۔ اداکارہ کا کہنا تھا کہ انہیں یہ سن کر بہت فخر محسوس ہوا۔
اداکارہ کا کہنا تھا کہ انہیں راج کپور نے جب انہیں اپنے ساتھ کام کی پیشکش کی تو انہوں نے انکار کر دیا اور انکار کی وجہ بتاتے ہوئے ان کا کہنا تھا کہ راج کپور کے ساتھ فلم میں کام کرنے سے انکار کی کوئی خاص وجہ نہیں تھی لیکن انہوں نے اپنے ملک میں ہی کام کرنے کو ترجیح دی۔
معروف اداکارہ لیلیٰ زبیری پاکستانی ڈراموں اور فلموں کی سینئر اداکارہ ہیں، انہوں نے کنکر، بے ایمان محبت، میرا پہلا پیار، ایک نئی سنڈریلا، در شہوار اور عینی کی آئے گی بارات، عشق لاحاصل اور جفا جیسے ڈراموں میں بہترین اداکاری کے جوہر دکھائے وہ 2016 میں فلم تیری میری لو اسٹوری اور ’ تھوڑی سیٹنگ تھورا پیار ‘میں بھی اداکاری کر چکی ہیں۔
