پاکستان پیپلز پارٹی کے رکن صوبائی اسمبلی مکیش کمار چاولہ نے وزیر ایکسائز اینڈ ٹیکسیشن کا حلف اٹھا لیا ہے۔
گورنر سندھ کامران ٹیسوری نے آج گورنر پاؤس میں مکیش چاولہ سے ان کے عہدے کا حلف لیا۔ حلف برداری کی تقریب میں وزیراعلیٰ سندھ سید مراد علی شاہ اور دیگر حکام بھی موجود تھے۔
یہ بھی پڑھیں: سندھ کابینہ میں رد وبدل اور قلمدان کی تبدیلیاں
سندھ کابینہ میں جمعہ کو بڑی تبدیلیاں کی گئی تھیں۔ پیپلزپارٹی کے رکن سندھ اسمبلی مکیش کمار چاؤلہ کو صوبائی وزیر مقرر کیا گیا تھا جبکہ صوبائی وزیر دوست علی راہموں سے ماحولیات کی وزارت لے کر انہیں وزیر اعلیٰ کا مشیر برائے موسمیاتی تبدیلی مقرر کیا گیا ہے۔
محکمہ لائیواسٹاک کا قلمدان صوبائی وزیر محمد علی ملکانی کو دے دیا گیا ہے، ایم پی اے سلیم بلوچ اور لال چند اوکرانی وزیراعلیٰ کے معاون خصوصی مقرر کیے گئے ہیں۔
مزید پڑھیں:محکمہ تعلیم سندھ نے پاکستان کی پہلی ٹرانس جینڈر ایجوکیشن پالیسی کا مسودہ منظور کرلیا
شرجیل انعام میمن سے محکمہ ایکسائز اینڈ ٹیکسیشن کی وزارت لے لی گئی، مکیش چاؤلہ سندھ کے وزیر ایکسائز اینڈ ٹیکسیشن مقرر، محمد علی ملکانی کو فشریز اور لائیواسٹاک کا قلمدان دے دیاگیا۔ رہنما پی پی بابل بھیئو ایک بار پھر سندھ کابینہ میں شامل ہو کر وزیر اعلیٰ کے مشیر مقرر ہوئے ہیں۔
وزیراعلیٰ کے معاونین خصوصی کو بھی قلمدان تفویض کردیے گئے ہیں۔ سلیم بلوچ کو پبلک ہیلتھ، جبار خان کو محکمہ خوراک کا قلمدان جبکہ لال چند اوکرانی کو اقلیتی امور کا قلمدان دیا گیا ہے۔ معاون خصوصی عثمان ہنگورو کو محکمہ پرائس کنٹرول جبکہ معاون خصوصی قاسم شاہ کو پبلک پرائیوٹ پارٹنر شپ کا قلمدان دیا گیا ہے۔
