وزیراعظم پاکستان شہباز شریف نے شوگر ملوں اور شوگر ڈیلرز کے حوالے سے بڑا فیصلہ کرتے ہوئے ایف بی آر، ایف آئی اے اور آئی بی کو چینی کی فروخت پر ٹیکس چوری، غیر دستاویزی سیلز اور قیمتوں میں اضافے کی روک تھام کے لیے مشترکہ کارروائی کی ہدایت کردی۔
وزیراعظم نے ہدایت کی کہ ایف بی آر، آئی بی اور ایف آئی اے شوگر سیکٹر میں سیلز ٹیکس کی چوری کے سدباب کو یقینی بنائیں، شوگر کرشنگ سیزن شروع ہورہا ہے، اس لیے شوگر ملوں اور ڈیلرز سے جی ایس ٹی کی 100 فیصد وصولی کو یقینی بنایا جائے۔
یہ بھی پڑھیں جہانگیر ترین کی شوگر ملز کو چینی برآمد کرنے کا سب سے بڑا کوٹہ الاٹ
وزیراعظم نے شوگر ملوں میں کیمرے نصب کرنے کا فیصلہ کرتے ہوئے کہاکہ اس اقدام سے چینی کی ذخیرہ اندوزی نہیں ہوسکے گی اور قیمتوں میں توازن رہے گا۔
انہوں نے کہاکہ ٹیکس چوری اور ذخیرہ اندوزی میں ملوث شوگر ملز مالکان کے خلاف سخت قانونی کارروائی کی جائے گی۔
وزیراعظم نے کہاکہ کیمروں کے ذریعے شوگر ملوں کے پیداواری عمل اور ذخیرہ اندوزی پر نظر رکھی جائے گی اور سیلز ٹیکس کی ادائیگی یقینی بنائی جائے گی۔
شہباز شریف نے کہاکہ چینی کی قیمتوں میں اضافہ کسی صورت برداشت نہیں کیا جائے گا، انہوں نے شوگر سٹہ مافیا کے خلاف سخت کارروائی کی ہدایت کی۔
یہ بھی پڑھیں شوگر ایڈوائزری بورڈ کا اجلاس، تاجکستان کو 40 ہزار میٹرک ٹن چینی برآمد کرنے کی سفارش
وزیراعظم نے کہاکہ اسٹیل، سگریٹ، سیمنٹ اور مشروبات سمیت دیگر شعبوں میں بھی اسی طرح کے اقدامات کیے جائیں۔
