لاہور ایئرپورٹ پر سول ایوی ایشن اور ایف آئی اے کے درمیان لڑائی کے بعد ایف آئی اے حکام نے سول ایوی ایشن ملازمین پر مقدمہ درج کرا دیا۔
مقدمہ درج کرانے کے خلاف لاہور ایئر پورٹ پر سول ایوی ایشن کے ملازمین نے ایف آئی اے کے خلاف احتجاج اور نعرہ بازی کی جس سے لاہور ائیر پورٹ کے فضائی آپریشن میں تعطل پیدا ہو گیا۔
اس دوران لاہور ایئر پورٹ کے کنکورس ہال اور چیک ان ایریا میں مسافروں کا شدید رش اور بدنظمی دیکھنے میں آئی ہے، مسافروں نےسول ایوی ایشن حکام کے خلاف کاروائی کا مطالبہ کیا ہے۔
مسافروں کا کہنا ہے کہ فضائی آپریشن رواں رکھنے کی ذمہ دار سول ایوی ایشن نے خود ہی فضائی آپریشن میں رکاوٹ پیدا کی۔
یاد رہے کہ گزشتہ روز لاہور کے علامہ اقبال ایئر پورٹ پر ایف آئی اے اہلکاروں کی جانب سے سول ایوی ایشن اتھارٹی کے با وردی پورٹر پر تشدد کی ویڈیو منظر عام پر آئی تھی۔
لاہور ائیرپورٹ۔ میدان جنگ بن گیا ۔ایف آٸی اے اہلکاروں کا پورٹر پر تشدد pic.twitter.com/pCxLNrMCH5
— Salahuddin ARY (@salahary) April 11, 2023
تشدد کا واقعہ علامہ اقبال ائیرپورٹ کے لاؤنج میں پیش آیا۔ انٹری گیٹ پر پہلے گزرنے کی ضد میں ایف آئی اے ملازم اور ایف آئی اے اہلکاروں کے مابین ہاتھا پائی ہوئی۔
سول ایوی ایشن کی رجسٹرڈ یونین نے واقعہ پر حکام سے نوٹس لینے کی اپیل کی تھی۔ یونین کے مرکزی چیئرمین ایاز بٹ نے واقعہ کی مذمت کرتے ہوئے کہا کہ ایف آئی اے کی غنڈہ گردی کا فوراً نوٹس نہ لیا گیا تو ائیرپورٹ آپریشن بند کرنے پر مجبور ہو جائیں گے۔
انہوں نے مزید کہا کہ انصاف نہ ملا تو ائیرپورٹ پر احتجاج کی کال دیں گے جس کی تمام تر ذمہ داری انتظامیہ پر ہوگی۔