خیبرپختونخوا کے ضلع بنوں میں فتنہ الخوارج کے دہشتگردوں سے لڑتے ہوئے جام شہادت نوش کرنے والے جوانوں کی نماز جنازہ بنوں گیریژن میں ادا کردی گئی۔
یہ بھی پڑھیں بنوں: خوارجیوں کا سیکیورٹی چیک پوسٹ پر حملہ، 12اہلکار شہید، 6خوارج ہلاک
پاک فوج کے شعبہ تعلقات عامہ (آئی ایس پی آر) کے مطابق شہدا کی نماز جنازہ میں کمانڈر پشاور کور سمیت اعلیٰ عسکری حکام، سول انتظامیہ اورفوجی جوانوں نے شرکت کی۔
دہشتگردوں سے لڑتے ہوئے شہید ہونے والوں میں صوبیدار عمران احمد فاروقی، حوالدار محمد جاوید اقبال، نائیک طہماس احمد، نائیک باسط فرید، سپاہی صفدر علی، سپاہی اسد بشیر شامل ہیں۔
اس کے علاوہ سپاہی اعجاز حسین، سپاہی عاطف خان، سپاہی امان اللہ، سپاہی شاہ زمان، سپاہی حسیب اللہ اور عثمان اللہ کی نماز جنازہ بھی بنوں گیریژن میں ادا کی گئی، جو دہشتگردوں سے لڑتے ہوئے شہادت کے رتبے پر فائز ہوئے۔
آئی ایس پی آر نے کہاکہ دفاع وطن میں ہمارے شہدا کی یہ عظیم قربانیاں ہمارے جذبے اور عزم کو تقویت دیتی ہیں۔
یہ بھی پڑھیں بنوں: سیکیورٹی چیک پوسٹ پر خودکش دھماکا، ایرانی سفیر کی مذمت
فوج کے شعبہ تعلقات عامہ کے مطابق پاکستان کی مسلح افواج قوم کی غیرمتزلزل حمایت سے دہشتگردی کے ناسور کا مکمل خاتمہ کرنے کے لیے پرعزم ہیں۔
