وزیراعظم پاکستان شہباز شریف نے کہا ہے کہ پی ٹی آئی کے مظاہرین کی جانب سے پولیس اہلکاروں پر حملہ قابل مذمت ہے، فرائض کی انجام دہی کے دوران شہید ہونے والے پولیس اہلکار کو پوری قوم خراج عقیدت پیش کرتی ہے۔
اپنے ایک بیان میں انہوں نے کہاکہ جب جب ملک ترقی کی منازل طے کرنے لگتا ہے، شرپسند جلاؤ گھیراؤ شروع کردیتے ہیں، 9 مئی 2023 کو فسادات برپا کرنے والے ایک بار پھر پرتشدد کارروائی کررہے ہیں۔
یہ بھی پڑھیں پی ٹی آئی کا قافلہ اسلام آباد کی جانب گامزن، جھڑپوں میں ایک پولیس اہلکار شہید
شہباز شریف نے احتجاجی مظاہرین کی جانب سے فائرنگ اور پتھراؤ میں زخمی ہونے والے پولیس اہلکاروں کو ہرممکن طبی سہولیات فراہم کرنے کی ہدایت کی ہے۔
انہوں نے پولیس سپاہی کی شہادت میں ملوث عناصر کی فوری نشاندہی کرکے قرارواقعی سزا دلوانے کی ہدایت کی ہے۔
واضح رہے کہ پی ٹی آئی کا پشاور سے آنے والا احتجاجی قافلہ اسلام آباد کی جانب گامزن ہے، پنجاب کی حدود میں داخل ہونے پر پولیس کے ساتھ جھڑپ میں پنجاب پولیس کا سپاہی شہید ہوگیا۔
یہ بھی پڑھیں حکمت عملی میں تبدیلی، پی ٹی آئی کا احتجاجی قافلہ کب اسلام آباد پہنچے گا؟
وزیر اطلاعات پنجاب عظمیٰ بخاری نے دعویٰ کیا ہے کہ پولیس کے 70 سے زیادہ اہلکار زخمی بھی ہیں، جن میں سے 5 کی حالت تشویشناک ہے۔
