پاکستان تحریک انصاف کی جانب سے اسلام آباد مارچ ، ڈی چوک دھرنا اور حکومتی کارروائی کے بعد خیبر پختونخوا میں گورنر راج لگانے کی خبریں بازگشت کرنے لگیں تو اچانک خیبر پختونخوا اسمبلی کا اجلاس رات 9 بجے طلب کر لیا گیا۔
خیبر پختونخوا اسمبلی سیکریٹریٹ کی جانب سے جاری نوٹیفیکشن کے مطابق اسپیکر خیبر پختونخوا نے صوبائی اسمبلی کا اجلاس رات 9 بجے طلب کیا ہے۔
یہ بھی پڑھیں: کیا خیبر پختونخوا میں گورنر راج لگ سکتا ہے؟
اسمبلی ذرائع نے بتایا کہ تمام اسمبلی اسٹاف ڈیوٹی مکمل کرکے گھروں کو گئے تھے کہ اچانک اسمبلی اجلاس کا فیصلہ ہوا جس کے بعد اسٹاف کو دوبارہ جلد اسمبلی پہنچنے کی ہدایت کی گئی اور اجلاس کا نوٹیفیکشن جاری کیا گیا۔
مزید پڑھیے: پولیس اور رینجرز کا پی ٹی آئی مظاہرین کے خلاف گرینڈ آپریشن، ڈی چوک خالی کروا لیا گیا
پی ٹی آئی رہنماؤں کے مطابق اسمبلی اجلاس بلانے کا فیصلہ وزیر اعلیٰ علی امین گنڈاپور کے پشاور پہچنے کے بعد کیا گیا اور اجلاس اسلام آباد میں پی ٹی آئی کے پرامن احتجاج اور ورکرز پر مبینہ فائرنگ، لاٹھی چارچ اور شیلنگ پر بات کرے گا اور مذمتی قراداد منظور کی جائے گی۔
وزیر اعلیٰ ہاؤس میں پی ٹی آئی کور کمیٹی کا اجلاس
وزیر اعلیٰ ہاؤس پشاور میں پی ٹی آئی کی کورکمیٹی کا اجلاس جاری ہے۔ ذرائع نے بتایا کہ اجلاس میں اسلام آباد مارچ اور ناکامی پر بھی بات ہو رہی ہے۔
