وزیراعلیٰ خیبرپختونخوا علی امین گنڈاپور نے قانون نافذ کرنے والے اداروں کو ہدایت کی ہے کہ جو بھی صوبے میں امن کو خراب کرے اس کے ساتھ دہشت گردوں والا سلوک کیا جائے۔
دورہ کوہاٹ کے موقع پر کرم کے معاملے پر قائم گرینڈ جرگے سے خطاب کرتے ہوئے انہوں نے کہاکہ صوبائی حکومت کی درخواست پر فوج علاقے میں امن کے لیے تعینات ہے، فوج، پولیس اور انتظامیہ مل کر علاقے میں پائیدار امن کے لیے مربوط کوششیں کررہے ہیں۔ انہوں نے انتظامیہ کو ہدایت کی کہ علاقے میں قائم تمام مورچے بلا تفریق ختم کیے جائیں۔
یہ بھی پڑھیں ضلع کرم میں متحارب گروہوں میں 10 روزہ جنگ بندی پر اتفاق ہوگیا، وزیر اعلیٰ خیبرپختونخوا
علی امین گنڈاپور نے کہاکہ سیاسی اختلافات اپنی جگہ، علاقے میں امن کے لیے وفاقی حکومت ایف سی کی پلاٹونز فراہم کرے۔
انہوں نے کہاکہ گرینڈ جرگہ مکمل امن کے قیام تک تک علاقے میں رہے، صوبائی حکومت ہر ممکن تعاون فراہم کرے گی، جو لوگ علاقے میں امن خراب کررہے ہیں مقامی کمیونٹی ان کی نشاندہی کرے۔
وزیراعلیٰ نے کہاکہ فریقین کے درمیان نفرت کی فضا کو ختم کرنے کے لیے مقامی عمائدین اپنا کردار ادا کریں۔
انہوں نے انتظامیہ کو ہدایت کی کہ علاقے میں لوگوں کے پاس موجود بھاری اسلحہ جمع کیا جائے جبکہ سرحدی علاقے کے لوگوں کے پاس موجود اسلحہ بھی امانتاً جمع کریں۔ جو بھی ہتھیار اٹھائے گا وہ دہشت گرد کہلائے گا، اور ایسے لوگوں کا انجام عبرتناک ہوگا۔
یہ بھی پڑھیں ضلع کرم میں مسافر گاڑیوں پر حملہ: ’ایسے نشانہ بنایا گیا جیسے چن چن کر ہمیں مار رہے ہوں‘
انہوں نے کہاکہ علاقے کے عارضی طور پر بے گھر ہونے والے افراد کے لیے فنڈز ترجیحی بنیادوں پر جاری کیے جائیں گے، اور صوبائی حکومت ان کی باعت واپسی یقینی بنائے گی۔
