وزیراعلیٰ خیبر پختونخوا علی امین گنڈا پور کا کہنا ہے کہ صوبائی ضلع کرم میں مخالف گروہوں کے مابین 10 روز کی جنگ بندی پر اتفاق کرلیا گیا ہے، تاہم پائیدار امن کے لیے مذاکرات کا راستہ اختیار کیا جائے گا۔
ضلع کرم کی صورتحال پر بریفنگ دیتے ہوئے علی امین گنڈا پور نے شورش زدہ ضلع کرم میں فریقین کے درمیان جنگ بندی کے اعلان کو خوش آئند قرار دیتے ہوئے واضح کیا ہے کہ علاقے میں پائیدارامن اور تنازعات کے حل کے لیے مذاکرات کا راستہ اختیار کیا جائے گا۔
یہ بھی پڑھیں:وزیراعلیٰ کے پی کی ضلع کرم میں امن و امان کا مسئلہ حل کرنے کے لیے جرگہ منعقد کرنے کی ہدایت
علی امین گنڈاپور کے مطابق کرم میں مخالف گروہوں کے درمیان 10 روز کے لیے جنگ بندی پر اتفاق کرتے ہوئے حالیہ واقعات میں ہونیوالے جانی و مالی نقصانات کے ازالے کے لیے تخمینہ لگایا جارہا ہے۔
دوسری جانب متحارب گروہوں کے درمیان معاملات معمول پر لانے کے لیے محفوظ نقل وحمل کے لیے سیکیورٹی پلان بھی مرتب کرنے کا کام جاری ہے۔
مزید پڑھیں:ضلع کرم میں سیکورٹی فورسز کا آپریشن، 7 خوارج ہلاک، 5 زخمی
واضح رہے کہ خیبر پختونخوا کے ضلع کرم میں مسافر گاڑیوں کے قافلے پر حملوں اور متحارب قبائل کی جھڑپوں میں مجموعی طور پر 102 افراد جاں بحق اور 138 زخمی ہوگئے تھے۔
