جوڈیشل کمیشن نے پشاور ہائی کورٹ کے لیے پہلی خاتون چیف جسٹس مسرت ہلالی کی تعیناتی کی سفارش کردی ہے۔
چیف جسٹس پاکستان عمرعطا بندیال کی سربراہی میں جوڈیشل کمیشن کے اجلاس میں جسٹس مسرت ہلالی کی مستقل بنیادوں پر پشاور ہائیکورٹ کے چیف جسٹس کی حیثیت سے تعیناتی کی سفارش متفقہ طور پر کی گئی ہے۔
جسٹس مسرت ہلالی اس پشاور ہائی کورٹ کی سینیئر ترین جج اور قائم مقام چیف جسٹس ہیں، جس کا حلف انہوں نے پشاور ہائیکورٹ کے دو سینیئر ترین ججز کی ریٹائرمنٹ کے بعد 2 اپریل کو اٹھایا تھا۔
تاہم جسٹس مسرت ہلالی کی بطور چیف جسٹس پشاور ہائی کورٹ تقرری کی حتمی منظوری پارلیمانی کمیٹی برائے ججز تقرری کرے گی۔ جس کے بعد ان کی تعیناتی کا نوٹیفیکیشن جاری ہوگا اور وہ اپنے عہدے کا حلف اٹھا سکیں گی۔
