وزیر اطلاعات عطا تارڑ نے کہا کہ پاکستان تحریک انصاف (پی ٹی آئی) ک لاشیں صرف ٹک ٹاک، فیس بک اور دیگر سوشل میڈیا پلیٹ فارمز پر ہی ملیں گی۔ تحریک انتشار کو چیلنج کرتا ہوں کہ کوئی ایک ویڈیو لے آئیں جس میں سیکیورٹی اہلکار فائرنگ کر رہے ہوں، گولی کیوں چلائی جھوٹا بیانیہ ہے، یہ ٹرخانے والی گولی ہے۔
وزیر اطلاعات عطا تارڑ نے پریس کانفرنس کرتے ہوئے کہا کہ پی ٹی آئی کا بیانیہ گولی چلانے کا نہیں گولی کرانے کا ہے، یہ کس طرح کی لاشیں ہیں جو زندہ ہورہی ہیں۔ جھوٹ کے ذریعے سیاست کو بدنام کیا جارہا ہے، یہ پر امن احتجاجی نہیں تھے بلکہ جدید اسلحے سے لیس تھے۔
عطا تارڑ کا کہنا تھا کہ مہنگائی 70ماہ کی کم ترین سطح پر آ گئی ہے، مہنگائی کا کم ہونا اس بات کی دلیل ہے کہ ہماری معیشت ترقی کر رہی ہے، زرمبادلہ کے ذخائر 11ارب ڈالر سے تجاوز کر گئے ہیں۔کنزیومر پرائس انڈیکس ہر ماہ نیچے جا رہا ہے۔
مزید پڑھیں: ’بشریٰ بی بی سے متعلق ایسی زبان استعمال کرتے ہوئے شرم آنی چاہیے‘، عطا تارڑ کے بیان پر صارفین کی تنقید
’اسٹاک مارکیٹ ایک لاکھ پوائنٹس کی حد عبور کرچکی ہے، شرح سود کم ہو کر 15 فیصد پر چلی گئی ہے، شرح سود کم ہونے سے ملک میں سرمایہ کاری میں اضافہ ہو رہا ہے‘۔
وفاقی وزیر اطلاعات کا کہنا تھا کہ وزیراعظم محمد شہباز شریف کی دن رات محنت اور کوششوں کی بدولت مہنگائی میں کمی واقع ہوئی، ہم ڈیفالٹ کے دھانے سے اس مقام پر پہنچے ہیں، ایم ڈی آئی ایم ایف نے بھی کہا تھا کہ وزیراعظم محمد شہباز شریف اگر اس معاملے کو سنجیدہ نہ لیتے تو ملک کا ڈیفالٹ سے بچنا ممکن نہیں تھا۔
انہوں نے کہا کہ ایک سیاسی جماعت ملک کو ڈیفالٹ کرانے کے لیے آئی ایم ایف کو خط لکھ رہی تھی، آج مہنگائی 4.8 فیصد، شرح سود 15 فیصد، ترسیلات زر 8.8 ارب ڈالر، زرمبادلہ کے ذخائر 11 ارب ڈالر ہو گئے ہیں۔ ترقی کا سلسلہ جاری ہے، اسٹاک ایکسچینج کا ایک لاکھ پوائنٹس کی سطح عبور کرنا، تمام ریکارڈ توڑ دینا اس بات کی دلیل ہے کہ معیشت کی ترقی ہوگئی ہے۔ ان شاءاللہ معاشی ترقی میں مزید بہتری آئے گی۔
وزیر اطلاعات نے کہا کہ تحریک انتشار گولی چلانے کا جھوٹا بیانیہ بنا رہی ہے، کوئی ایک ثبوت پیش کریں جس میں قانون نافذ کرنے والے اداروں کا کوئی اہلکار فائرنگ کرتا ہوا دکھائی دے، ان کے پاس کوئی ایک ویڈیو ثبوت موجود نہیں ہے۔ ایسا کوئی واقعہ پیش ہی نہیں آیا جس کے بارے میں یہ کوئی ثبوت پیش کر سکیں۔
’ایک شخص کے بھاگنے کی ویڈیو سامنے آئی جس میں وہ کہہ رہا ہے کہ مجھے گولی لگ گئی، یہ ویڈیو وائرل بھی ہوئی، یہی شخص ایک دوسری ویڈیو میں کہتا ہے کہ میرے ہاتھ پر چوٹ آئی ہے۔ اس شخص نے اپنے ہاتھ سے پٹی کھول کر ویڈیو میں دکھائی جس میں اس کے ہاتھ پر گولی کا کوئی نشان نظر نہیں آیا‘۔
عطا تارڑ نے کہا کہ یہ وہ لوگ ہیں جو جھوٹ پر ریاست کو بدنام کرتے ہیں، پی ٹی آئی لاشوں پر جھوٹ پھیلا رہی ہے، لطیف کھوسہ نے کہا کہ ان کے گھر پر کئی لاشیں موجود ہیں۔ بیرسٹر گوہر نے کہا کہ سب غلط ہے 12 لاشیں ہیں۔ لاش ایک بھی نہیں، ہوتی تو سامنے آ جاتیں۔
یہ بھی پڑھیں: پی ٹی آئی سے ملکی ترقی ہضم نہیں ہو رہی ان کا احتجاج غیر قانونی ہے، عطا تارڑ
’قوم کے ساتھ بھونڈا مذاق کیا جا رہا ہے، قوم کی بدقسمتی ہے کہ ایسے لوگ سیاسی جماعتیں بنا لیتے ہیں جنہیں کوئی عقل اور فہم نہیں ہے، پولیس اور رینجرز کے 4جوان شہید ہوئے، ان کے خاندانوں کے ساتھ کسی نے اظہار ہمدردی نہیں کیا‘۔
وزیر اطلاعات کا کہنا تھا کہ یہ سیکیورٹی فورسز اور پولیس کے جوانوں کو نشانہ بناتے ہیں، پی ٹی آئی نوسربازوں کی جماعت ہے، ایک شخص نے ویڈیو پیغام دیا کہ اس کے بیٹے کو شہید کرنے کی غلط اطلاعات پھیلائی گئیں، اس نے تردید کی اور کہا کہ یہ فیک نیوز ہے اور میرا بیٹا گھر پر بیٹھا ہے۔
’یہ اپنی شرمندگی چھپانے کے لیے لاشوں کی سیاست کر رہے ہیں، یہ آپس کی لڑائی میں بدست و گریبان ہیں‘۔
انہوں نے مزید کہا کہ یہ نوسربازوں کی جماعت ہے، کہا گیا نماز پڑھنے والے کو کنٹینر سے گرا دیا گیا اور وہ شہید ہو گیا، کنٹینر نماز پڑھنے کی جگہ نہیں، اسلام آباد میں مساجد ہیں۔
