ماہ دسمبر کا آغاز ہونے پر بھی پاکستان میں اب تک سردی کی شدت اس قدر نہیں بڑھی جس طرح کے عام طور پر اس ماہ میں ہوتی ہے، نتیجتاً عمومی وبائی امراض سر اٹھانے لگے ہیں، ایسے میں محمکہ موسمیات نے خوشخبری سنائی ہے کہ آج سے ملک کے مختلف علاقوں میں بارش کا امکان ہے۔
یہ بھی پڑھیں:موسمیاتی تبدیلوں کے اثرات: پاکستان کی تاریخ کا گرم ترین نومبر، اوسط درجہ حرارت کیا رہا؟
محکمہ موسمیات کے مطابق سندھ، بلوچستان اور پنجاب کے علاقوں میں سرد اور تیز ہوائیں چلنے کا امکان ہے جبکہ پہاڑوں پر برفباری بھی ہوسکتی ہے۔
مغربی ہوائیں ملک کے بالائی علاقوں میں داخل ہوں گی جس کے پیش نظر آج سے 8 دسمبر کے دوران مری، گلیات، اسلام آباد، راولپنڈی اور لاہور سمیت پنجاب کے مختلف علاقوں میں بارش متوقع ہے۔
محکمہ موسمیات کے مطابق ادھر چترال، دیر، سوات، مالاکنڈ سمیت کے پی، گلگت بلتستان اور آزاد کشمیر میں بھی بارش اور پہاڑوں پر برفباری کا امکان ظاہر کیا گیا ہے۔
