مدارس کی رجسٹریشن اور اصلاحات کے حوالے سے ایک اہم اجلاس آج اسلام آباد میں منعقد ہو رہا ہے۔ اجلاس میں پاکستان بھر سے ہر مکتبہ فکر کے جید علما اجلاس میں شرکت کریں گے۔ اجلاس میں علما کرام سے مدارس رجسٹریشن اور اصلاحات کے حوالے سے رائے لی جائے گی۔
اجلاس میں ڈائریکٹر جنرل آف ریجلیس ایجوکیشن غلام قمر، وفاقی وزیر تعلیم خالد مقبول صدیقی اور وفاقی وزیر مذہبی امور چودھری سالک حسین بھی شریک ہوں گے۔ اجلاس میں معاونت کے لیے چیئرمین وفاق المدارس مولانا علامہ طاہر اشرفی، ڈاکٹر راغب نعیمی اور مولانا عبدالکریم آزاد بھی موجود ہوں گے۔
مزید پڑھیں: مدارس رجسٹریشن ایشو کیا ہے، اس پر اتنی سیاست کیوں ہورہی؟
اجلاس میں 2019 میں حکومت اور علما کے درمیان مدارس کے حوالے سے طے پائے جانے والے معاہدہ بھی زیر غور آئے گا۔ مدارس رجسٹریشن کے حوالے سے ڈائریکٹوریٹ جنرل آف ریلیجیئس ایجوکیشن (ڈی جی آر ای) 22 اکتوبر 2019 کو ملک بھر میں قائم کیے گئے تھے۔ پاکستان بھر میں 17653 مدارس ڈی جی آر ای میں رجسٹرڈ ہیں۔
598 مدارس کو 1196 اساتذہ فراہم کیے گئے، 163 مدارس میں قومی نصاب متعارف کرایا گیا ہے۔ اب تک 1491 طالب علموں کو پاکستانی ویزے کے حصول اور توسیع میں مدد فراہم کی گئی ہے۔ اجلاس کے اختتام پر علامہ طاہر اشرفی، ڈی جی آر ای، ڈاکٹر راغب نعیمی و دیگر میڈیا کو بریفنگ بھی دیں گے۔
