شام کے معزول صدر بشار الاسد کے والد حافظ الاسد کے مقبرے کو نذرِ آتش کردیا گیا۔
خبر ایجنسی اے ایف پی نے بشارالاسد کے والد حافظ الاسد کے مزار کو آگ لگنے کے واقعے کی ویڈیو حاصل کی ہے، ویڈیو میں فوجی وردیوں میں ملبوس جنگجوؤں اور نوجوانوں کو دیکھا جاسکتا ہے، جو مزار کو جلتا دیکھ رہے ہیں۔
یہ بھی پڑھیں: روس نے انسانی ہمدردی کی بنیاد پر بشارالاسد اور ان کے خاندان کو پناہ دے دی
اے ایف پی کے مطابق شام میں انسانی حقوق کے مبصر گروپ سیرین آبزرویٹری فار ہیومن رائٹس نے بتایا کہ اپوزیشن نے الاسد کے علوی فرقے کے علاقے صوبہ لاذقیہ میں واقع اس مقبرے کو آگ لگائی ۔
اے ایف پی کی فوٹیج میں دکھایا گیا کہ مقبرے کے کچھ حصے آگ کی لپیٹ میں آکر تباہ ہوچکے ہیں۔
یہ وسیع و عریض مزار ایک پہاڑی پر بنایا گیا ہے، اس کی تعمیر میں پیچیدہ ڈیزائن اور متعدد محرابیں شامل ہیں، جبکہ اس کے بیرونی حصے پر پتھر پر نقش و نگار کندہ ہیں۔
یہ بھی پڑھیں: شام میں موجود پاکستانیوں کی واپسی کے لیے فوری اقدامات ناگزیر ہیں، وزیر اعظم
یہ مزار الاسد خاندان کے دیگر افراد کی قبروں کو بھی اپنے اندر سموئے ہوئے ہے۔ اس میں بشارالاسد کے بھائی باسل الاسد کی قبر بھی ہے، جو 1994 میں ایک سڑک حادثے میں جاں بحق ہو گئے تھے۔
