اسلام آباد پولیس نے سوشل میڈیا پر بندیتی پر مبنی مہم چلانے پر پاکستان تحریک انصاف (پی ٹی آئی) کے سوشل میڈیا انچارج اظہر مشوانی سمیت دیگر ملزمان کو نوٹسز جاری کردیے ہیں۔
آئی جی اسلام آباد کی جانب سے جاری نوٹسز ملزمان اظہر مشوانی، صبغت اللہ وِرک، محمد ارشد، عطاالرحمان، کومل آفریدی، عروسہ ندیم شاہ اور ایم علی ملک کو جاری کیے گئے۔ نوٹس میں جے آئی ٹی نے ملزمان کو 13 دسمبر (جمعہ) کو طلب کیا ہے۔
یہ بھی پڑھیں: پی ٹی آئی کی سوشل میڈیا مہم پاکستان میں انتشار، بدامنی اور تفرقہ بازی کو فروغ دے رہی ہے، وزارت داخلہ
واضح رہے کہ ملزمان نے سوشل میڈیا پر بدنیتی پر مبنی مہم کے ذریعے پاکستان میں افراتفری اور انتشار پھیلایا جس پر وفاقی حکومت نے سوشل میڈیا پر جرائم کی روک تھام کے لیے پیکا ایکٹ 2016 کے سیکشن 30 کے مطابق آئی جی پولیس کے ماتحت ایک مشترکہ تحقیقاتی ٹیم کی تشکیل دی۔
جے آئی ٹی ملزمان اور ان کے ساتھیوں کے پس پردہ مقاصد کا تعین کرنے کے لیے معاملے کی تحقیقات کررہی ہے، مزید مجرموں کی شناخت اور ان کے خلاف قابل اطلاق قوانین کے تحت کارروائی عمل میں لائی جا رہی ہے۔
یہ بھی پڑھیں: اسلام آباد پولیس پر پشتون عوام کا اعتماد، سوشل میڈیا کی من گھڑت مہم بے نقاب
جے آئی ٹی کے پاس ملزمان کے خلاف ملک میں بد امنی اور انتشار پھیلانے کے لیے سوشل میڈیا پر پروپیگنڈا کرنے کے ٹھوس شواہد موجود ہیں۔
