پاکستان شوبز انڈسٹری کی معروف اداکارہ سائرہ یوسف جو اپنی شاندار شخصیت اور اداکاری کی وجہ سے پسند کی جاتی ہیں انہوں نے حال ہی میں طلاق اور دوسری شادی کے بارے میں اپنے خیالات کا اظہار کردیا۔
سائرہ یوسف کا کہنا ہے کہ ان پر دوسری شادی کرنے کا کوئی دباؤ نہیں ہے، اداکارہ کے مطابق وہ اپنی زندگی میں بہت خوش ہیں اس لیے انہوں نے دوسری شادی کرنے کے بارے میں نہیں سوچا۔ انہوں نے کہا کہ جس طرح معاشرے میں طلاق کی شرح بڑھ رہی ہے والدین اب اس بات کو قبول کر چکے ہیں کہ ایک رشتہ ختم ہونے کے بعد کسی اور کے ساتھ نئی زندگی کی شروعات کرنا آسان نہیں ہے۔
یہ بھی پڑھیں: شہروز سے دوبارہ شادی کے سوال پر سائرہ یوسف کیا کہتی ہیں؟
سائرہ یوسف نے حال ہی میں ایک پوڈکاسٹ میں شرکت کی جہاں اُنہوں نے بات کرتے ہوئے کہا کہ خواتین پر دوسری شادی کا دباؤ اس لیے ڈالا جاتا ہے کیونکہ کسی کے لیے بھی زندگی گزارنا آسان نہیں ہے لیکن اب لوگ اس بات کو قبول کرنے لگے ہیں کہ اگر پہلی شادی کی ناکامی پر کوئی دوسری شادی نہیں کرنا چاہتا تو کوئی مسئلہ نہیں ہے۔
اداکارہ کا کہنا تھا کہ بہت ساری خواتین ایسی ہیں جنہیں خود مختار نہ ہونے کی وجہ سے اپنے بچوں کو چھوڑ کر دوسری شادی کرنی پڑی جو کسی صورت بھی درست نہیں ہے۔ بچوں کو ساتھ لے کر بھی نئی زندگی شروع کی جا سکتی ہے۔ اس کے لیے خواتین کا خودمختار ہونا ضروری ہے اداکارہ نے اپنی زندگی کے حوالے سے کہا کہ انہوں نے خودمختار ہونے کی وجہ سے بہت سے فیصلے خود لیےہیں۔
یہ بھی پڑھیں: دلیپ کمار کے ہالی وڈ کے لیے انکار پر سائرہ بانو کو کیوں خوشی ہوئی؟
سائرہ یوسف نے کہا کہ شادی کرنے کا فیصلہ تب کرنا چاہیے جب انسان خود مختار ہو، جب وہ ذہنی و جذباتی طور پر شادی کرنے کے لیے تیار نہیں تو پھر بعد میں بہت مسئلے ہوتے ہیں۔ جیون ساتھی میں ہونے والی خوبیوں کے بارے میں بات کرتے ہوئے انہوں نے کہا کہ ان کے لیے یہ اہم ہے کہ ایک فرد خدا سے ڈرتا ہو، اور وہ پارٹنر میں یہی خوبی دیکھنا چاہیں گی۔
خیال رہے کہ سائرہ یوسف اور شہروز سبزواری نے 2012 میں شادی کی تھی اور ان کی ایک بیٹی نورے بھی ہے جب کہ ان کے درمیان 2020 میں طلاق ہوگئی تھی۔ دونوں کے درمیان طلاق کے کچھ عرصے بعد ہی شہزور سبزواری نے ماڈل صدف کنول سے دوسری شادی کرلی تھی اور ان سے بھی اداکار کو ایک بیٹی ہے۔
