پاکستان کرکٹ ٹیم کے فاسٹ بولر شاہین شاہ آفریدی نے بنگلہ دیش پریمیئر لیگ (بی پی ایل) کو جوائن کرلیا۔
شاہین شاہ آفریدی نے بی پی ایل 2024 کے لیے فارچیون باریشال کو جوائن کیا ہے، جو اسٹار کھلاڑیوں کو لانے کے لیے شہرت رکھتی ہے۔
یہ بھی پڑھیں کیریبیئن پریمیئر لیگ میں کون سے پاکستانی کرکٹرز ایکشن میں نظر آئیں گے؟
باریشال نے ہمیشہ بڑے بین الاقوامی کرکٹ اسٹارز کے ساتھ معاہدہ کر کے شائقین کو مسلسل حیران کیا ہے۔
اس سے قبل ویسٹ انڈیز سے تعلق رکھنے والے کرس گیل جیسے کرکٹ لیجنڈز جو ٹی20 کرکٹ میں کارکردگی کے حوالے سے مشہور ہیں، باریشال کے لیے کھیلتے رہے ہیں۔
اس کے علاوہ گزشتہ سیزن میں جنوبی افریقہ کے معروف بیٹر ڈیوڈ ملر نے ٹیم کی نمائندگی کی۔ اسی رجحان کو جاری رکھتے ہوئے باریشال نے اب آنے والے بی پی ایل سیزن کے لیے پاکستان کے اسٹار فاسٹ بولر شاہین آفریدی کے ساتھ معاہدہ کیا ہے۔
موجودہ بی پی ایل چیمپیئنز فارچیون باریشال نے آج باضابطہ طور پر اعلان کیاکہ انہوں نے 24 سالہ شاہین آفریدی کو براہِ راست معاہدے کے ذریعے حاصل کرلیا ہے۔ یہ پہلا موقع ہے جب پاکستانی فاسٹ بولر شاہین شاہ بی پی ایل میں ایکشن میں نظر آئیں گے۔
واضح رہے کہ بی پی ایل کا آغاز رواں سال 30 دسمبر سے ہونا ہے، تاہم شاہین شاہ صرف باریشال کے ٹورنامنٹ میں پہلے 5 میچوں کے لیے دستیاب ہوں گے۔
یہ بھی پڑھیں پاکستانی کرکٹر شاہین شاہ آفریدی کا مانچسٹر یونائیٹڈ کی فٹبال کٹ لانچ کرنے کا تاریخی لمحہ
پاکستان کرکٹ بورڈ (پی سی بی) نے شاہین شاہ آفریدی کو 15 جنوری 2024 تک کھیلنے کی اجازت دی ہے، جبکہ بی پی ایل سیزن 7 فروری کو ختم ہوگا۔
