چیف آف آرمی اسٹاف جنرل سیّد عاصم منیر نے کہا ہے کہ فتنہ الخوارج اور سہولت کاروں کے خاتمے تک ان کا پیچھا کریں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے جنوبی وزیرستان کے علاقے وانا کا دورہ کیا، جہاں انہیں موجودہ سیکیورٹی صورت حال اور انسداد دہشتگردی کی جاری کارروائیوں کے بارے میں بریفنگ دی گئی۔
یہ بھی پڑھیں جنوبی وزیرستان: سیکیورٹی چیک پوسٹ پر خوارج کا حملہ، 16 جوان شہید، 8 دہشتگرد ہلاک
اس موقع پر پاک فوج کے افسران اور جوانوں سے خطاب کرتے ہوئے آرمی چیف نے دہشتگردی کے خلاف جنگ میں پاک فوج کے جوانوں کی ثابت قدمی کو سراہا اور قربانیوں کی تعریف کی۔
جنرل عاصم منیر نے کہاکہ شہدا پاکستان کا فخر ہیں، ان کی قربانیوں کو کبھی فراموش نہیں کیا جائے گا۔ پاک فوج قوم کی پرعزم حمایت کے ساتھ ملک بھر میں پائیدار امن و استحکام کی بحالی کو یقینی بناتے ہوئے دہشت گردی اور انتہا پسندی کو ختم کرےگی۔ ریاست کے خلاف مجرمانہ کارروائیوں میں ملوث دہشتگردوں کو قیمت چکانا ہوگی۔
آرمی چیف نے کہاکہ پاکستان کی مسلح افواج کی جرات اور غیرمتزلزل عزم ملک کی خودمختاری کا سنگ بنیاد ہے۔ انہوں نے سیکیورٹی فورسز کے جوانوں کو قوم کے حقیقی ہیرو قرار دیا۔
یہ بھی پڑھیں افواج پاکستان کا شمالی وزیرستان میں آپریشن، ایک جوان شہید، 7 دہشتگرد ہلاک
انہوں نے کہاکہ ریاست کے خلاف مذموم سرگرمیوں میں ملوث فتنہ الخوارج اور ان کے سہولت کاروں کا خاتمہ کیا جائےگا، دہشتگردی پر اکسانے اور مالی مالی معاونت کرنے والوں کا خاتمہ کریں گے۔ قبل ازیں وانا پہنچنے پر کور کمانڈر پشاور نے ان کا استقبال کیا۔
