پی ٹی آئی رہنما اسد قیصر نے کہا ہے کہ ہمارے 2-3 سینیئر لوگ آج دستیاب نہیں، آج ہماری ابتدائی میٹنگ ہے، ایجنڈا سامنے رکھا ہے۔
اجلاس میں شرکت سے قبل صحافیوں سے گفتگو ہوئے سابق اسپیکر قومی اسمبلی کا کہنا تھا کہ ہمارے قیدیوں کی رہائی کی بات ہو گی، 26 نومبر کے واقعے کی جوڈیشل انکوائری ہو، امن و امان کی صورت حال اور معاشی چیلنجز کی بات ہوگی۔
یہ بھی پڑھیں: ’جمہوریت میں مذاکرات ہی سیاسی مسائل کا واحد حل ہیں‘ مذاکراتی کمیٹیوں کا پہلا ان کیمرہ اجلاس جاری
اسد قیصر کا کہنا تھا کہ ملک اس طرح نہیں چلے گا، ملک انارکی کی طرف بڑھ رہا ہے، ملک میں سیاسی استحکام کی ضرورت ہے۔
واضح رہے کہ حکومت اور پی ٹی آئی کے درمیان مذاکرات ہو رہے ہیں۔ ان مذاکرات کی میزبانی اسپیکر قومی اسمبلی ایاز صادق کر رہے ہیں۔
ایاز صادق ان مذاکرات کے حوالے سے خاصا پُرجوش ہیں۔ ان کا کہنا ہے کہ حکومت اور اپوزیشن کے مابین مذاکرات کا عمل نیک شگون ہے۔ مذاکرات کا عمل جمہوریت کا حسن ہے۔ حکومت اور اپوزیشن کا مل بیٹھنا جمہوریت کو مضبوط بنائے گا۔ جمہوریت میں مذاکرات ہی سیاسی مسائل کا واحد حل ہیں۔ یہ ملک ہمارا اور ہمیں عوام نے منتخب کرکے اپنے مسائل کے حل کے لیے بھیجا ہے۔
یہ بھی پڑھیں:ہمیشہ کہتا ہوں جو حکومت کر رہے ہیں مذاکرات اُن سے ہوں، عارف علوی
اسپیکر قومی اسمبلی سردار ایاز صادق کی صدارت میں حکومتی اور حزب اختلاف کی مذاکراتی کمیٹیوں کا پہلا ان کیمرہ اجلاس پارلیمنٹ ہاؤس اسلام آباد میں جاری ہے۔ اسپیکر قومی اسمبلی نے حکومت اور حزب اختلاف کی مذاکراتی کمیٹیوں کے اراکین کو اجلاس میں شرکت پر خوش آمدید کہا۔ ان کا کہنا تھا کہ پارلیمان 24 کروڑ عوام کا منتخب ادارہ ہے اور عوام کو پارلیمان سے بہت سی امیدیں وابستہ ہیں۔
مزید پڑھیں: ’عمران خان کیخلاف 190 ملین پاؤنڈ ریفرنس کا فیصلہ لکھا جا رہا ہے‘
سردار ایاز صادق نے کہا کہ بطور عوامی نمائندے ہم نے عوام کے مسائل کا حل تلاش کرنا ہے۔ حکومت اور اپوزیشن کے مابین خوشگوار تعلقات سے ملک کے مسائل کو خوش اسلوبی سے حل کیا جا سکتا ہے۔ ملک کی معاشی ترقی کا دارومدار سیاسی استحکام سے جڑا ہوا ہے۔ ملک کی موجودہ صورتحال سیاسی ہم آہنگی کو فروغ دینے کا تقاضا کرتی ہے۔
اسپیکر نے حکومت اور حزب اختلاف کے اراکین کو مذاکراتی کمیٹی تشکیل دینے کے عمل کو خوش آئند قرار دیا۔ کہا وزیراعظم کا شکر گزار ہوں انہوں نے کمیٹی بنادی ہے، حکومت کی سنجیدگی دیکھیں کہ سینیئر ممبران کمیٹی کا حصہ ہیں۔ میرا کام ہے سہولت کاری ہے، فیصلہ فریقین نے خود کرنا ہے، دونوں اپنے مطالبات سامنے رکھیں گے اور ان پر بات ہوگی۔ میں نیوٹرل رہ کر سہولت کاری کرنا چاہوں گا، اللّٰہ پاکستان کے لیے بہتر کرے اور مشکلات حل کرے۔ پاکستان کی خاطر مذاکرات ہورہے ہیں۔
مزید پڑھیں: فوجی عدالتوں کا فیصلہ عمران خان کو ملٹری کورٹس میں لے جانے کا منصوبہ ہے، تحریک انصاف
مذاکراتی کمیٹی کے پہلے ان کیمرہ اجلاس میں حکومت کی جانب سے نائب وزیراعظم اسحاق ڈار، مشیر وزیراعظم برائے سیاسی امور رانا ثنا اللہ اور سینیٹر عرفان صدیقی، سابق اسپیکر راجا پرویز اشرف، سید نوید قمر، ڈاکٹر فاروق ستار اور علیم خان موجود ہیں جبکہ حزب اختلاف کی جانب سے مذاکراتی کمیٹی میں سابق اسپیکر اسد قیصر، صاحبزادہ حامد رضا اور سینیٹر علامہ ناصر عباس شامل ہیں۔
