دبئی میں قائم پورٹ آپریٹر ڈی پی ورلڈ کے مطابق اکتوبر میں ’پہلے براہِ راست شپنگ روٹ‘ کے آغاز کے بعد سے پاکستان سے بنگلہ دیش کے لیے ایک ہزار سے زیادہ کنٹینرز بھیجے جا چکے ہیں۔
یہ بھی پڑھیں:عوامی لیگ نے متنازع بنا دیا، شیخ مجیب کو بابائے قوم نہیں سمجھتے، بنگلہ دیشی مشیر اطلاعات
گلف نیوز نے رپورٹ کیا ہے کہ نئے براہِ راست کنکشن نے ٹرانزٹ کے اوقات میں 50 فیصد سے زیادہ کمی کی ہے اور ٹرانس شپمنٹ کی ضرورت کو ختم کرکے علاقائی رابطے میں اضافہ کیا ہے۔
یہ اقدام دبئی میں قائم ڈی پی ورلڈ اور پاکستان کی نیشنل لاجسٹک کارپوریشن (NLC) کے درمیان مشترکہ منصوبہ ہے۔ یہ 6 ممالک کو جوڑنے والی ایک وسیع سروس کے حصے کے طور پر نئے روٹ سے مستفید ہو رہا ہے۔
یہ راستہ پورٹ کلنگ (ملائیشیا)، جیبل علی (یو اے ای)، کراچی (پاکستان)، چٹوگرام (بنگلہ دیش)، بیلوان (انڈونیشیا) اور موندرا (انڈیا) کے کو ملاتا ہے۔
ڈی پی ورلڈ کے چیف ایگزیکٹو اور گروپ کے چیئرمین سلطان بن سلیم کے مطابق ’یہ نیا روٹ ہمیں بہت سے علاقائی اور عالمی راستوں سے بھی جڑتا ہے، جس سے کاروبار اور تاجروں کو ہمارے عالمی نیٹ ورک کے تمام حصوں سے رابطہ ملتا ہے‘۔
یہ بھی پڑھیں:فیس بک رومانس: پاکستانی نوجوان شادی کے لیے بنگلہ دیش پہنچ گیا
30 اکتوبر کو پاک بنگلہ دیش کے درمیان شروع کیے گئے اس روٹ پر پہلا سفر 304 کنٹینرز کے ساتھ ہوا، اس روٹ پر کراچی سے براہ راست تجارتی سامان چٹگرام تک پہنچایا گیا۔
ڈی پی ورلڈ کے ایک بیان میں کہا گیا ہے کہ ’ٹرانس شپمنٹ کی ضرورت کے خاتمے کے ساتھ براہ راست شروع کی جانے والی اس سروس سے کراچی اور چٹوگرام کے درمیان تجارتی سفر گھٹ کر 11 دن ہوگیا ہے، جس سے سامان کی تیز تر ترسیل کے باعث وقت اور لاجسٹکس کے اخراجات میں کمی آئی ہے‘۔
ڈی پی ورلڈ کے مطابق ’اس روٹ پر دوسری سروس کے دوران میں کراچی سے چٹاگرام کے درمیان تجارتی سامان پہلے کے مقابلے میں دوگنا رہا، جو اس سروس کی بڑھتی ہوئی مانگ کو ظاہر کرتا ہے‘۔
