پاکستان مسلم لیگ ن کے سینیئر رہنما حنیف عباسی نے کہا ہے کہ 9 مئی کے جن ملزمان کو پریس کانفرنس کروا کر چھوڑا گیا وہ بھی منصوبہ سازوں میں شامل تھے، ملک میں عمران خان اور بی ایل اے کی صورت میں خوارج پیدا کرنے کی سازش ہورہی ہے، جس شخص نے رینجرز اہلکاروں کو کچلا وہ اعتراف کرچکا کہ اس نے عمران خان کی تقاریر سے متاثر ہوکر یہ اقدام اٹھایا۔
راولپنڈی میں پریس کانفرنس کرتے ہوئے انہوں نے کہاکہ پی ٹی آئی کے ایکس اکاؤنٹ سے پروپیگنڈا کیا جاتا ہے، 26 نومبر کو ہزاروں لوگوں کے مرنے اور زخمی ہونے کی باتیں کی گئیں، ہمیں اپنے ملک کے خلاف ہونے والی سازشوں کو بھانپنا ہوگا۔
یہ بھی پڑھیں سانحہ 9 مئی: ملٹری کورٹس نے عمران خان کے بھانجے حسان نیازی سمیت 60 مزید مجرمان کو سزائیں سنا دیں
حنیف عباسی نے کہاکہ ایٹمی پروگرام اس ملک اور قوم کا ہے، 9 مئی کے جن ملزمان کو سزائیں سنائی گئیں ان کی فوجی تنصیبات پر حملوں کی فوٹیجز موجود ہیں۔
مسلم لیگی رہنما نے کہاکہ پاکستان میں سازشوں کے آلہ کار ہمارے ہی لوگ ہیں، ہمیں واضح کرنا ہوگا کہ ہم شام، عراق یا لیبیا نہیں، کیونکہ پاکستان کو آج شام اور عراق ماڈل پر پرکھا جا رہا ہے، ملک میں پشتون کارڈ کھیلنے کی بھی کوشش کی گئی۔
انہوں نے کہاکہ شہباز شریف کی قیادت میں ملک ترقی کی راہ پر گامزن ہے، پی ٹی آئی بڑے عرصے سے سول نافرمانی کی بات کررہی ہے، ان لوگوں نے ورلڈ بینک اور آئی ایم ایف کے سامنے احتجاج کیے، پاکستان کو امداد نہ دینے کے لیے عالمی مالیاتی فنڈ کو خطوط لکھے گئے اور لابی فرمز ہائر کرکے پاکستان پر حملہ آور ہونے کی کوشش کی گئی۔
انہوں نے کہاکہ 26 نومبر کو ملک میں جو کچھ ہوا وہ پاکستان پر حملہ تھا، اس روز پاکستان کی پیٹھ میں چھرا گھونپا گیا، آج افغانستان جیسے ملک کی جانب سے بھی ہمیں آنکھیں دکھائی جارہی ہیں اور اس پر پی ٹی آئی کے ایکس اکاؤنٹ سے شادیانے بجائے جارہے ہیں۔
انہوں نے کہاکہ میں نے پارلیمنٹ میں تحریک انصاف سے معافی مانگنے کا مطالبہ نہیں کیا، اگر معافی دینی ہی ہے تو سزا پانے والے بچوں کو دی جائے، اگر میرا رشتے دار بھی فوجی تنصیبات پر حملہ کرے تو اس کا فوجی عدالت میں ٹرائل ہونا چاہیے۔
یہ بھی پڑھیں نواز شریف، آصف زرداری اور عمران خان مذاکرات کے لیے بیٹھ جائیں تو مسائل حل ہوجائیں گے، رانا ثنااللہ
انہوں نے مزید کہاکہ اگر کوئی سمجھتا ہے کہ ڈونلڈ ٹرمپ اقتدار سنبھالتے ہی پاکستان پر حملہ آور ہوجائیں گے تو ہم دیکھ لیں گے، تحریک انصاف والوں کو اپنا منطقی انجام نظر آرہا ہے۔
