جماعت اسلامی پاکستان (جےآئی پی) کے امیر حافظ نعیم الرحمان نے حکومت پر زور دیا ہے کہ وہ مقبوضہ کشمیر کی آزادی کے لیے عملی اقدامات کرے، جماعت اسلامی کشمیری عوام کی آزادی تک ان کے ساتھ کھڑی رہے گی۔
یہ بھی پڑھیں:شنگھائی تعاون تنظیم کے سربراہ اجلاس میں مسئلہ فلسطین اٹھایا جائے، حافظ نعیم الرحمان کا مطالبہ
جماعت اسلامی پاکستان کے شعبہ میڈیا اینڈ پبلیکیشن کی جانب سے جاری بیان میں حافظ نعیم الرحمان نے کہا کہ کشمیر کے آزاد علاقوں کو درپیش مسائل کو حل کرنا حکمرانوں کی ذمہ داری ہے۔ جماعت اسلامی نے آزاد کشمیر کے مسائل کے حل کے لیے مسلسل جدوجہد کی ہے۔
حافظ نعیم الرحمان نے کہا کہ جماعت اسلامی نے ہمیشہ گلگت بلتستان کے عوام کے حقوق کے لیے جدوجہد کی ہے اور مسئلہ کشمیر پر مسلسل شعور اجاگر کیا ہے اور آئندہ بھی کرتے رہیں گے۔
انہوں نے ریاست کے آزاد علاقوں کو بااختیار بنانے اور انہیں تحریک آزادیٔ کشمیر کا حقیقی بیس کیمپ بنانے کی ضرورت پر بھی زور دیا۔ انہوں نے کہا کہ آزاد کشمیر اور گلگت بلتستان کے آزاد علاقوں کو بااختیار بنایا جائے کیونکہ وہ تحریک آزادیٔ کشمیر کی اصل بنیاد ہیں۔
حافظ نعیم الرحمان نے وفاقی اور صوبائی حکومتوں پر زور دیا کہ وہ آزاد کشمیر اور گلگت بلتستان میں آئندہ انتخابات میں مداخلت سے گریز کریں اور منصفانہ اور شفاف انتخابی عمل کو یقینی بنائیں۔
